ក្រសួងការពារជាតិអ៊ីស្រាអែល បាននិយាយកាលពីថ្ងៃចន្ទថា មន្ត្រីអ៊ីស្រាអែល និងសហរដ្ឋអាមេរិក បានចាប់ផ្តើមអនុវត្តគម្រោងថវិកាចំនួន ៥,២ពាន់លានដុល្លារអាមេរិក ដើម្បីពង្រឹងប្រព័ន្ធការពារដែនអាកាសរបស់អ៊ីស្រាអែល។

ក្រសួងបានបញ្ជាក់នៅក្នុងសេចក្តីថ្លែងការណ៍មួយថា ភាគីអ៊ីស្រាអែល និងសហរដ្ឋអាមេរិក បានបញ្ចប់ការចុះកិច្ចព្រមព្រៀងមួយ ដើម្បីផ្តួចផ្តើមកញ្ចប់ជំនួយដែលនឹងពង្រឹងប្រព័ន្ធប្រឆាំងរ៉ូកែត Iron Dome របស់អ៊ីស្រាអែលប្រព័ន្ធការពារមីស៊ីល David's Sling និងប្រព័ន្ធការពារឡាស៊ែរ Iron Beam។

កញ្ចប់នេះ គឺជាផ្នែកមួយនៃជំនួយយោធាតម្លៃ ៨,៧ ពាន់លានដុល្លារ ដែលអ៊ីស្រាអែល បាននិយាយកាលពីចុងខែកញ្ញាថា ខ្លួនបានទទួលពីសហរដ្ឋអាមេរិក ដែលក្នុងនោះ ថវិកា ៣,៥ពាន់លានដុល្លារ ត្រូវបានផ្ទេរទៅឲ្យអ៊ីស្រាអែលរួចហើយសម្រាប់ «ការផ្គត់ផ្គង់សម័យសង្រ្គាមជាបន្ទាន់»។

យោងតាមប្រភពផ្លូវការរបស់អ៊ីស្រាអែល បានឲ្យដឹងថា សហរដ្ឋអាមេរិក បានជួយអ៊ីស្រាអែល ចាប់តាំងពីការចាប់ផ្តើមនៃជម្លោះជាមួយក្រុមហាម៉ាស កាលពីថ្ងៃទី ៧ ខែតុលា ឆ្នាំមុន ដោយបានបញ្ជូនយន្តហោះ និងនាវាពីរបីរយគ្រឿង ជាមួយនឹងអាវុធ គ្រាប់បែក និងគ្រាប់រំសេវ។

ជំនួយយោធារបស់សហរដ្ឋអាមេរិក បាននាំឲ្យមានការរិះគន់យ៉ាងទូលំទូលាយ ខណៈដែលការវាយប្រហាររបស់អ៊ីស្រាអែលដែលកំពុងបន្តនៅក្នុងតំបន់ហ្កាហ្សាស្ទ្រីប កំពុងឆក់យកជីវិតមនុស្សកាន់តែច្រើនឡើងៗ។

យោងតាមទិន្នន័យចុងក្រោយបំផុតពីអាជ្ញាធរសុខាភិបាលដែលមានមូលដ្ឋាននៅតំបន់ហ្កាហ្សា ចំនួនអ្នកស្លាប់របស់ប៉ាឡេស្ទីនពីការវាយប្រហារដែលកំពុងបន្តរបស់អ៊ីស្រាអែល នៅក្នុងដែនដីនេះ បានកើនឡើងដល់ ៤២.៦០០នាក់។