ប្រភពរដ្ឋាភិបាលមួយ បាននិយាយនៅថ្ងៃអង្គារនេះថា ប្រទេសកូរ៉េខាងត្បូង កំពុងពិចារណាពីការបញ្ជូនបុគ្គលិកមួយក្រុមទៅកាន់ប្រទេសអ៊ុយក្រែន ដើម្បីតាមដានកងទ័ពកូរ៉េខាងជើង ដែលកំពុងត្រូវបានដាក់ពង្រាយឲ្យជួយគាំទ្រដល់ប្រទេសរុស្ស៊ី។

កាលពីសប្តាហ៍មុន ទីភ្នាក់ងារចារកម្មរបស់ទីក្រុងសេអ៊ូល បានអះអាងថា ប្រទេសកូរ៉េខាងជើង បានបញ្ជូនកងកម្លាំងពិសេសប្រហែល ១.៥០០នាក់ ទៅកាន់ប្រទេសរុស្ស៊ីក្នុងខែនេះ ដើម្បីចូលរួមក្នុងសង្គ្រាមនៅអ៊ុយក្រែន។ យោងតាមប្រភពស៊ើបការណ៍មួយបានឲ្យដឹងថា កូរ៉េខាងជើង ត្រូវបានគេរំពឹងថា នឹងបញ្ជូនកងទ័ពសរុបចំនួន ១២.000 នាក់ ពីអង្គភាពកងកម្លាំងសម្រាំងពិសេស។

ប្រភពបាននិយាយថា៖«មានលទ្ធភាពដែលបុគ្គលិក នឹងត្រូវបានបញ្ជូនទៅកាន់ប្រទេសអ៊ុយក្រែន ដើម្បីត្រួតពិនិត្យមើលពីយុទ្ធសាស្ត្រ និងសមត្ថភាពប្រយុទ្ធរបស់កងកម្លាំងពិសេសកូរ៉េខាងជើង ដែលបានបញ្ជូនទៅគាំទ្ររុស្ស៊ី»។

ប្រសិនបើត្រូវបានបញ្ជូនទៅពិតមែននោះ ក្រុមនេះ ត្រូវបានគេរំពឹងថា នឹងមានបុគ្គលិកយោធាមកពីអង្គភាពចារកម្ម ដែលអាចវិភាគយុទ្ធសាស្ត្រសមរភូមិរបស់កូរ៉េខាងជើង ឬចូលរួមក្នុងការសួរចម្លើយជនជាតិកូរ៉េខាងជើង ដែលត្រូវបានចាប់ខ្លួន។

រដ្ឋាភិបាលក៏កំពុងពិចារណាលើការគាំទ្រសព្វាវុធសម្រាប់អ៊ុយក្រែនក្នុងការផ្លាស់ប្តូរដែលអាចធ្វើទៅបាន ពីគោលនយោបាយរបស់ខ្លួន មិនផ្តល់ជំនួយដែលអាចបង្កឲ្យមានគ្រោះថ្នាក់ទេ។