ចៅក្រមនៅរដ្ឋ Michigan របស់សហរដ្ឋអាមេរិក កាលពីថ្ងៃចន្ទ (២១ តុលា) បានច្រានចោលកិច្ចខិតខំប្រឹងប្រែងរបស់គណបក្សសាធារណរដ្ឋ ក្នុងការរារាំងជនជាតិអាមេរិកមួយចំនួនដែលកំពុងរស់នៅក្រៅប្រទេស មិនឱ្យបោះឆ្នោតនៅក្នុងរដ្ឋប្រទាញប្រទង់មួយនេះ។

គណៈកម្មាធិការជាតិបក្សសាធារណរដ្ឋ RNC បានដាក់ពាក្យបណ្តឹងនៅដើមខែនេះ ដោយលើកហេតុផលថា ច្បាប់បោះឆ្នោតនៅក្នុងរដ្ឋបានអនុញ្ញាតឱ្យពលរដ្ឋអាមេរិកដែលរស់នៅក្រៅប្រទេស ដែលមិនធ្លាប់រស់នៅក្នុងរដ្ឋ Michigan ប៉ុន្តែមានសាច់ញាតិនៅទីនោះ មានសិទ្ធិបោះឆ្នោតនៅទីនោះដោយមិនត្រឹមត្រូវ។

លោកស្រីចៅក្រម ស៊ីម៉ា ផាថែល (Sima Patel) នៃតុលាការរដ្ឋ Michigan បាននិយាយនៅក្នុងសេចក្តីសម្រេចមួយថា ដំណើរការបោះឆ្នោតដែលត្រូវបានជំទាស់ដោយគណបក្សសាធារណរដ្ឋនេះ គឺស្របតាមច្បាប់សហព័ន្ធ និងរដ្ឋ។

យោងតាមមន្រ្តីបោះឆ្នោតនៅរដ្ឋ Michigan បានឱ្យដឹងថា ពលរដ្ឋអាមេរិក ដែលមិនធ្លាប់រស់នៅក្នុងសហរដ្ឋអាមេរិក ប៉ុន្តែមានឪពុកម្តាយ អាណាព្យាបាលស្របច្បាប់ ឬប្តីប្រពន្ធដែលធ្លាប់ក្នុងរដ្ឋ Michigan មានសិទ្ធិបោះឆ្នោតក្នុងរដ្ឋនេះ ដរាបណាពលរដ្ឋទាំងនោះមិនបានចុះឈ្មោះ ឬបោះឆ្នោតនៅក្នុងរដ្ឋមួយផ្សេងទៀត៕