អ្នកនាំពាក្យកងកម្លាំងការពារអ៊ីស្រាអែល (IDF) លោក Daniel Hagari បាននិយាយថា យោធាអ៊ីស្រា  អែល បានរកឃើញលេណដ្ឋានរបស់ក្រុមហេសបូឡាដែលរក្សាទុកប្រាក់ និងមាសសរុបចំនួន០,៥ពាន់លានដុល្លារ នៅក្រោមមន្ទីរពេទ្យ ក្នុងទីក្រុងបេរូត( Beirut)។

យោងតាមលោក Hagariបានឲ្យដឹងថា លេណដ្ឋានដែលត្រូវសង្ស័យថា បានប្រើប្រាស់ដោយអតីតមេដឹកនាំរបស់ក្រុមហេសបូឡា លោក Hassan Nasrallah មានទីតាំងនៅ «ដោយផ្ទាល់នៅក្រោមមន្ទីរពេទ្យ Al-Sahel នៅកណ្តាលទីក្រុងបេរូត»។

លោកបានថ្លែងប្រាប់សន្និសីទមួយថា៖«លេណដ្ឋាននេះ មានបន្ទប់ គ្រែ ហេដ្ឋារចនាសម្ព័ន្ធសម្រាប់ការ  ស្នាក់នៅរយៈពេលយូរ និងសមត្ថភាពធ្វើការប្រយុទ្ធពីក្រោមដី។ ក្រុមហេសបូឡា បានសាងសង់លេណដ្ឋាននេះនៅក្រោមមន្ទីរពេទ្យដោយផ្ទាល់»។ "យោងតាមការប៉ាន់ប្រមាណដែលយើងមាន យ៉ាងហោចណាស់សាច់ប្រាក់សុទ្ធកន្លះពាន់លានដុល្លារ និងមាស ត្រូវបានរក្សាទុក នៅក្នុងលេណដ្ឋាននេះ»។

លោកបានបង្ហាញរូបភាព3D នៃលេណដ្ឋានក្រោមមន្ទីរពេទ្យ។ លោកបាននិយាយថា អ៊ីស្រាអែល «នឹងមិនវាយប្រហារមន្ទីរពេទ្យដោយខ្លួនឯងទេ» ប៉ុន្តែបានព្រមានថា កងកម្លាំងអាកាសអ៊ីស្រាអែល «កំពុងឃ្លាំមើលបរិវេណនោះ»។

លោកបានសង្កត់ធ្ងន់ថា៖«ខ្ញុំកំពុងអំពាវនាវឲ្យរដ្ឋាភិបាលលីបង់ អាជ្ញាធរលីបង់ និងអង្គការអន្តរជាតិនានា កុំអនុញ្ញាតឲ្យក្រុមហេសបូឡា ប្រើប្រាស់លុយនេះសម្រាប់ភេរវកម្ម និងវាយប្រហារអ៊ីស្រាអែល»ដោយបានបន្ថែមថា ប្រាក់នេះ អាចត្រូវបានប្រើប្រាស់ក្នុងការកសាងប្រទេសលីបង់ ជាជាងផ្តល់អាវុធដល់ក្រុមហេសបូឡា។