យ៉ាងហោចណាស់អង្គការសេរីភាពសារព័ត៌មាន និងសិទ្ធិមនុស្សចំនួន ១៨ស្ថាប័ន បានសម្តែងការគាំទ្ររបស់ពួកគេ កាលពីថ្ងៃចន្ទ (ទី២១ ខែតុលា) ចំពោះលិខិតរបស់សភាដែលជំរុញឲ្យរដ្ឋបាលរបស់លោក Joe Biden ទាមទារឲ្យអ៊ីស្រាអែលត្រូវអនុញ្ញាតឲ្យចូលដោយឯករាជ្យទៅកាន់តំបន់ហ្កាហ្សា សម្រាប់ទាំងអ្នកសារព័ត៌មានអាមេរិក និងអន្តរជាតិ។

សេចក្តីថ្លែងការណ៍គាំទ្រ ត្រូវបានចេញផ្សាយដោយគណៈកម្មាធិការការពារអ្នកសារព័ត៌មាន (CPJ) ជាស្ថាប័នឃ្លាំមើលប្រព័ន្ធផ្សព្វផ្សាយមួយ ដែលបាន និងកំពុងតាមដានចំនួនបាត់បង់ជីវិតជាប្រវត្តិសាស្ត្ររបស់អ្នកសារព័ត៌មានបណ្តាលមកពីការកាត់ផ្តាច់តំបន់ហ្កាហ្សាដែលកំពុងបន្តមានរបស់អ៊ីស្រាអែល។ គិតចាប់តាំងពីការលុកលុយតំបន់នេះកើតមានឡើង កងកម្លាំងអ៊ីស្រាអែលបានរារាំងបណ្ដាញសារព័ត៌មានបរទេសមិនឲ្យចូលទៅកាន់ដែនដីប៉ាឡេស្ទីនដោយឯករាជ្យឡើយ។

សេចក្តីថ្លែងការណ៍បានសរសេរថា៖ «ខណៈពេលដែលអ្នកសារព័ត៌មានអន្តរជាតិជាង ៤.០០០នាក់ បានធ្វើដំណើរទៅកាន់ប្រទេសអ៊ីស្រាអែល ដើម្បីរាយការណ៍ពីសង្រ្គាមដែលកំពុងបន្តមាន អ៊ីស្រាអែលនៅតែបន្តបដិសេធមិនឲ្យពួកគេចូលទៅកាន់តំបន់ហ្កាហ្សា លើកលែងតែដំណើរទស្សនកិច្ចសារព័ត៌មានដឹកនាំដោយយោធាដែលកម្រកើតមាន និងត្រូវបានគ្រប់គ្រងយ៉ាងតឹងរ៉ឹង ទៅកាន់ដែនដីដែលហែកហួរដោយសង្រ្គាម»។

សេចក្ដីថ្លែងការណ៍នោះបានបន្ថែមថា៖ «ការហាមប្រាមដ៏មានប្រសិទ្ធភាព លើការរាយការណ៍បរទេសនេះ បានដាក់បន្ទុកដែលមិនគួរកើតមាន និងមិនសមហេតុផល ទៅលើអ្នកសារព័ត៌មានប៉ាឡេស្ទីន នៅតំបន់ហ្កាហ្សា ដើម្បីចងក្រងសង្គ្រាមដែលកំពុងបន្តមាន នៅដែនដីដែលពួកគេកំពុងរស់នៅ»។

គួរបញ្ជាក់ថា បើយោងតាមរបាយការណ៍ CPJ ដែលបានប្រកាសកាលពីឆ្នាំមុន បានបង្ហាញថា អ្នកសារព័តមានជាង ១២៨នាក់ ត្រូវបានសម្លាប់ ចាប់តាំងពីថ្ងៃទី៧ ខែតុលា ឆ្នាំ២០២៣ ដោយប្រកាសថា ហ្កាហ្សា គឺជាតំបន់សង្រ្គាម «ដ៏គ្រោះថ្នាក់បំផុតមិនធ្លាប់មាន» សម្រាប់អ្នកសារព័ត៌មាន៕