អង់គ្លេសនឹងផ្តល់ប្រាក់កម្ចី ២,២៦ពាន់លានផោន(ស្មើនឹង២,៩៤ពាន់លានដុល្លារ)ដល់អ៊ុយក្រែន ជាផ្នែកមួយនៃប្រាក់កម្ចីតាមផែនការច្រើនជាងមុនពីក្រុមប្រទេសមានឧស្សាហកម្មរីកលូតលាស់ G7គាំទ្រដោយទ្រព្យសកម្មបង្កករបស់ធនាគារកណ្តាលរុស្ស៊ី ដើម្បីជួយទិញអាវុធ និងកសាងឡើងវិញហេដ្ឋារចនាសម្ព័ន្ធរងការខូចខាតនៅក្នុងប្រទេសអ៊ុយក្រែន ។

រដ្ឋមន្រ្តីការពារជាតិអង់គ្លេសលោក John Healey និយាយថា ប្រាក់បរិច្ចាគដោយអង់គ្លេសសម្រាប់យោធាអ៊ុយក្រែន ហើយអាចប្រើប្រាស់ជួយផលិតយានដ្រូនដែលមានសមត្ថភាពធ្វើដំណើរបានឆ្ងាយជាងមីស៊ីលរយៈចម្ងាយឆ្ងាយមួយចំនួនទៀត ។

លោក Healey និយាយថា ការប្រើប្រាស់ចំណែករបស់អង់គ្លេសក្នុងប្រាក់កម្ចី G7 បានក្លាយជាលក្ខណៈពិសេសនៃកិច្ចប្រជុំរវាងប្រធានាធិបតីអ៊ុយក្រែនលោក Volodymyr Zelenskiy និងនាយករដ្ឋមន្រ្តីអង់គ្លេសលោក Keir Starmer ក្នុងទីក្រុងឡុងដ្រ៍ កាលពីរយៈពេល ២សប្តាហ៍មុន ហើយនិងជំនួបក្រុមរដ្ឋមន្រ្តីការពារជាតិ G7 នៅប្រទេសអ៊ីតាលី កាលពីចុងសប្តាហ៍កន្លងទៅ ។

កាលពីខែមិថុនាកន្លងទៅ ក្រុមប្រទេស G7បានប្រកាសថា ពួកគនឹងផ្តល់ប្រាក់កម្ចី ៥០ពាន់លានដុល្លារ ដើម្បីជួយអ៊ុយក្រែន ដែលជាប្រាក់ចំណេញបានមកពីទ្រព្យសកម្មបង្កករបស់រុស្ស៊ីប្រហែល ៣០០ពាន់លានដុល្លារនៅលោកខាងលិច ។

ទ្រព្យសកម្មទាំងនេះ ត្រូវបានបង្កកភ្លាមៗក្រោយរុស្ស៊ីបើកការវាយប្រហារទ្រង់ទ្រាយពេញលេញលើអ៊ុយក្រែនកាលពីខែកុម្ភៈ ឆ្នាំ ២០២២ ។

រុស្ស៊ី បានគំរាមម្តងហើយម្តងទៀតពីការសងសឹកចំពោះការប្រើប្រាស់ទ្រព្យសកម្មបង្កករបស់ពួកគេ ដើម្បីផ្តល់ហិរញ្ញប្បទានដល់អ៊ុយក្រែន ដែលពួកគេចាត់ទុកថាជារឿងខុសច្បាប់ ៕