មន្ត្រីក្រសួងបង្រួបបង្រួមជាតិ បាននិយាយនៅថ្ងៃអង្គារនេះថា ចំនួនអ្នករត់ចោលស្រុកកូរ៉េខាងជើងចូលមកកូរ៉េខាងត្បូង ក្នុងរយៈពេល ៩ខែដំបូងនៃឆ្នាំ ២០២៤ បានកើនឡើងដល់ ១៨១នាក់ ដែលមានការកើនឡើង បើធៀបនឹងរយៈពេលដូចគ្នា កាលពីឆ្នាំមុន។

មន្ត្រីរូបនេះ បាននិយាយក្នុងលក្ខខណ្ឌមិនបញ្ចេញឈ្មោះថា ក្នុងចំណោមអ្នកសរុប ៧៦នាក់ មានប្រុស ១២នាក់ និងស្ត្រី ៦៤នាក់ បានមកដល់ភាគខាងត្បូង ក្នុងអំឡុងខែកក្កដា ដល់ខែកញ្ញា ដែលនាំឲ្យចំនួនអ្នករត់ចោលស្រុកកូរ៉េខាងជើងសរុបកើនដល់ ៣៤.២៥៩នាក់។

មន្ត្រីរូបនេះ បានបន្ថែមថា៖«(ចំនួនអ្នករត់ចោលស្រុកក្នុងត្រីមាសទី៣) គឺខ្ពស់ជាងបន្តិច បើធៀបនឹងរយៈពេលដូចគ្នាកាលពីឆ្នាំមុន និងត្រីមាសទី២នៃឆ្នាំនេះ។ ប៉ុន្តែដោយសារការប្រែប្រួលប្រចាំត្រីមាស និងកត្តាផ្សេងៗ យើងត្រូវតាមដានយ៉ាងដិតដល់នូវចំនួនសរុបនៃការមកដល់សម្រាប់ឆ្នាំនេះ»។

ចំនួនអ្នករត់ចោលស្រុកកូរ៉េខាងជើងដែលចូលមកកូរ៉េខាងត្បូង មានការកើនឡើង បន្ទាប់ពីការថយចុះយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ ដោយសារការបិទព្រំដែនដ៏តឹងរ៉ឹងរបស់ទីក្រុងព្យុងយ៉ាង ដើម្បីទប់ស្កាត់ជំងឺរាតត្បាត COVID-19។