តំណាងកូរ៉េខាងជើងមួយរូប ប្រចាំនៅអង្គការសហប្រជាជាតិ (UN) កាលពីថ្ងៃចន្ទ (ទី២១ ខែតុលា) បាននិយាយថា ប្រទេសកូរ៉េខាងជើងមិនបានបញ្ជូនទាហានទៅរុស្ស៊ី ដើម្បីជួយទីក្រុងមូស្គូប្រយុទ្ធជាមួយអ៊ុយក្រែននោះឡើយ ដោយបានច្រានចោលការអះអាងរបស់ទីក្រុងសេអ៊ូលថា ជា «ពាក្យចចាមអារ៉ាមគ្មានមូលដ្ឋានច្បាស់លាស់»។

គួរបញ្ជាក់ថា ទីភ្នាក់ងារចារកម្មរបស់ទីក្រុងសេអ៊ូល បានឲ្យដឹងកាលពីថ្ងៃទី១៨ ខែតុលាថា ទីក្រុងព្យុងយ៉ាង បានបញ្ជូនកងកម្លាំង «ទ្រង់ទ្រាយធំ» ដើម្បីជួយសម្ព័ន្ធមិត្តរបស់ខ្លួន ដោយអះអាងថា កងកម្លាំងពិសេសចំនួន ១.៥០០នាក់ បាន និងកំពុងហ្វឹកហាត់រួចហើយ នៅក្នុងតំបន់ចុងបូព៌ារបស់រុស្ស៊ី ហើយត្រៀមខ្លួនជាស្រេច ដើម្បីឆ្ពោះទៅសមរភូមិជួរមុខនៃសង្គ្រាមអ៊ុយក្រែន ក្នុងពេលឆាប់ៗនេះ។

ពាក់ព័ន្ធនឹងការលើកឡើងនេះ នៅឯកិច្ចប្រជុំគណៈកម្មាធិការ អំឡុងមហាសន្និបាតអង្គការសហប្រជាជាតិ តំណាងកូរ៉េខាងជើងមួយរូប បានប្រាប់ថា៖ «ទាក់ទងនឹងអ្វីដែលត្រូវបានហៅថា កិច្ចសហប្រតិបត្តិការយោធាជាមួយរុស្ស៊ី គណៈប្រតិភូរបស់ខ្ញុំ មិនមានអារម្មណ៍ថា ត្រូវការការអត្ថាធិប្បាយអ្វី ជុំវិញពាក្យចចាមអារ៉ាមគ្មានមូលដ្ឋានបែបនេះទេ»។

អំឡុងកិច្ចប្រជុំដែលបានធ្វើឡើងកាលពីល្ងាចថ្ងៃទី២១ ខែតុលា នៅទីក្រុងញូវយ៉ក សហរដ្ឋអាមេរិក តំណាងរូបនោះបានលើកឡើងថា ការអះអាងរបស់ទីក្រុងសេអ៊ូលគឺ «ក្នុងគោលបំណងបំផ្លាញមុខមាត់របស់កូរ៉េខាងជើង និងធ្វើឲ្យខូចដល់ទំនាក់ទំនងស្របច្បាប់ មិត្តភាព និងកិច្ចសហប្រតិបត្តិការ រវាងរដ្ឋអធិបតេយ្យភាពទាំង២»។

សូមបញ្ជាក់បន្ថែមថា ទីក្រុងព្យុងយ៉ាង និងមូស្គូ គឺជាសម្ព័ន្ធមិត្តនឹងគ្នា ចាប់តាំងកូរ៉េខាងជើងកកើតឡើង ក្រោយសង្គ្រាមលោកលើកទី២ ហើយកាន់តែមានភាពជិតស្និត ចាប់តាំងពីមានការលុកលុយរបស់រុស្ស៊ីទៅលើអ៊ុយក្រែន នៅឆ្នាំ២០២២ ដោយទីក្រុងសេអ៊ូល និងវ៉ាស៊ីនតោន បានអះអាងជាយូរមកហើយថា លោក គីម ជុងអ៊ុន បានបញ្ជូនអាវុធ សម្រាប់ការប្រើប្រាស់ នៅប្រទេសអ៊ុយក្រែន៕