ក្រុមមន្ត្រី នៅថ្ងៃអង្គារ (ទី២២ ខែតុលា) នេះ បាននិយាយថា មនុស្សយ៉ាងហោចណាស់ ៣នាក់ ក្នុងនោះរួមមានទាំងកុមារម្នាក់ផងដែរ បានបាត់បង់ជីវិត នៅក្នុងការវាយប្រហារដោយយានដ្រូនរបស់រុស្ស៊ីទៅលើទីក្រុង Sumy នៅភាគឦសាននៃប្រទេសអ៊ុយក្រែន។

ប្រធានរដ្ឋបាលប្រចាំតំបន់ លោក Ihor Kalchenko បានប្រាប់នៅលើកម្មវិធីផ្ញើសារ Telegram ថា ការវាយប្រហារដែលជាផ្នែកមួយនៃការវាយប្រហារពេញមួយយប់លើអ៊ុយក្រែន បានកំណត់គោលដៅសង្កាត់លំនៅឋាន និងហេដ្ឋារចនាសម្ព័ន្ធសំខាន់ៗ។ លោកបានបង្ហោះរូបភាពពីកម្ទេចកម្ទីបាក់បែក និងផ្ទះសម្បែងដែលរងការខូចខាត។

នៅក្នុងសេចក្តីថ្លែងការណ៍មួយ យោធាអ៊ុយក្រែនបានឲ្យដឹងថា ប្រព័ន្ធការពារដែនអាកាសបានបំផ្លាញយានដ្រូនបានចំនួន ៤២គ្រឿង ក្នុងចំណោម ៦០គ្រឿង ដែលរុស្ស៊ីបានបាញ់បង្ហោះសំដៅតំបន់ផ្សេងៗរបស់អ៊ុយក្រែន។ យោធាបានបន្ថែមថា ១០គ្រឿងផ្សេងទៀត ត្រូវបាន «ធ្វើឲ្យបាត់បង់ដាន ឬមិនអាចវាយប្រហារដល់គោលដៅ» ។

យ៉ាងណាក្ដី មន្ត្រីក្នុងតំបន់ បាននិយាយថា ស្ត្រីម្នាក់បានរងរបួសនៅព្រឹកថ្ងៃអង្គារ នៅពេលដែលយានដ្រូនរបស់រុស្ស៊ីបានវាយប្រហារចំចំណតរថយន្តក្រុងមួយកនលេង នៅក្នុងទីក្រុង Kherson ភាគខាងត្បូង។

គួរបញ្ជាក់ថា រុស្ស៊ីតែងតែបានបដិសេធមិនកំណត់គោលដៅវាយប្រហារលើជនស៊ីវិល នៅក្នុងប្រតិបត្តិការលុកលុយទ្រង់ទ្រាយធំរបស់ខ្លួន ដែលបានចាប់ផ្តើមក្នុងខែកុម្ភៈ ឆ្នាំ២០២២ ប៉ុន្តែបាញ់មីស៊ីល និងយានដ្រូនជាប្រចាំសំដៅមជ្ឈមណ្ឌលមានប្រជាជន ដែលមិនមែនជាតំបន់សមរភូមិជួរមុខ៕