វិទ្យាស្ថាន Robert Koch (RKI) សម្រាប់សុខភាពសាធារណៈ នៅថ្ងៃអង្គារ (ទី២២ ខែតុលា) នេះ បានឲ្យដឹងថា ករណីដំបូងនៃវីរុសបំប្លែងថ្មីនៃជំងឺអុតស្វា ឬអឹមផក (Mpox) ត្រូវបានរកឃើញនៅក្នុងប្រទេសអាល្លឺម៉ង់ ដោយបន្ថែមថា ខ្លួនចាត់ទុកថា ហានិភ័យ ចំពោះប្រជាជន នៅតែមានកម្រិតទាប។

នៅក្នុងសេចក្តីថ្លែងការណ៍មួយ វិទ្យាស្ថានបានលើកឡើងថា ការឆ្លងដែលបង្កឡើងដោយវីរុសបំប្លែងថ្មី ដែលបានឆ្លងពីក្រៅប្រទេស ត្រូវបានរកឃើញនៅថ្ងៃទី១៨ ខែតុលា។ ស្ថាប័ននេះបានកត់សម្គាល់ថា ការមានទំនាក់ទំនងជិតស្និទ្ធដោយផ្ទាល់នឹងរាងកាយ ទើបឆ្លងជំងឺនេះ។

យ៉ាងណាក្ដី អមដោយការបន្ថែមថា ខ្លួនកំពុងតាមដានស្ថានការណ៍យ៉ាងដិតដល់ ហើយនឹងកែប្រែការវាយតម្លៃរបស់ខ្លួន ប្រសិនបើចាំបាច់នោះ RKI បានប្រាប់ថា៖ «បច្ចុប្បន្ន RKI ចាត់ទុកហានិភ័យ ចំពោះសុខភាពរបស់ប្រជាជនទូទៅ នៅក្នុងប្រទេសអាល្លឺម៉ង់ មានកម្រិតទាបនៅឡើយទេ»។

គួរបញ្ជាក់ថា អង្គការសុខភាពពិភពលោក (WHO) បានប្រកាសថា ជំងឺ Mpox ជាគ្រាអាសន្នសុខភាពសាធារណៈសាកលជាលើកទី២ ក្នុងរយៈពេល ២ឆ្នាំ កាលពីខែសីហា បន្ទាប់ពីការផ្ទុះឡើងនៃការឆ្លងយយ៉ាងឆាប់រហ័ស នៅប្រទេសសាធារណរដ្ឋប្រជាធិបតេយ្យកុងហ្គោ ដែលបានរីករាលដាលដល់ប្រទេសជិតខាង៕