រដ្ឋមន្ត្រីក្រសួងរតនាគារសហរដ្ឋអាមេរិក លោកស្រី ចេណេត យេលែន (Janet Yellen) បាននិយាយកាលពីថ្ងៃអង្គារ (២២ តុលា) ថា ក្រុមប្រទេសទាំង៧ ឬ G7 និងសម្ព័ន្ធមិត្តរបស់សហភាពអឺរ៉ុប “កំពុងតែជិតឈានដល់” ការសម្រេចលើកញ្ចប់ប្រាក់កម្ចីចំនួន ៥០ពាន់លានដុល្លារ ដល់អ៊ុយក្រែន ដែលគាំទ្រដោយទ្រព្យសម្បត្តិបង្កករបស់រុស្ស៊ី ជាមួយនឹងការរួមចំណែករបស់សហរដ្ឋអាមេរិក ដែលរំពឹងទុកប្រហែល ២០ពាន់លានដុល្លារ។

លោកស្រី Yellen បានប្រាប់សន្និសីទសារព័ត៌មានមួយនៅពេលចាប់ផ្តើមនៃកិច្ចប្រជុំប្រចាំឆ្នាំរបស់មូលនិធិរូបិយវត្ថុអន្តរជាតិ និងធនាគារពិភពលោកថា លោកស្រីមានទំនុកចិត្តខ្ពស់ថាទ្រព្យសម្បត្តិអធិបតេយ្យភាពរបស់រុស្ស៊ី ដែលភាគច្រើនត្រូវបានបង្កកនៅអឺរ៉ុប នឹងនៅតែត្រូវបានរក្សាទុកជាអចិន្ត្រៃយ៍ បើទោះបីជាត្រូវតម្រូវឱ្យបន្តឡើងវិញនៃការបង្កកជារៀងរាល់ ៦ខែម្ដងរបស់សហភាពអឺរ៉ុបក៏ដោយ។

នៅពេលត្រូវសាកសួរពីកិច្ចចរចាចុងក្រោយលើប្រាក់កម្ចីរបស់អ៊ុយក្រែននៅចុងឆ្នាំនេះ លោកស្រី Yellen បាននិយាយថា “យើងជិតនឹងបញ្ចប់ផ្នែករបស់អាមេរិកនៃកញ្ចប់ប្រាក់កម្ចី ៥០ពាន់លានដុល្លារនេះហើយ”។ លោកស្រីសង្កត់ធ្ងន់ថា វិភាគទានរបស់អាមេរិក នឹងត្រូវសងមកវិញពីប្រាក់ចំណូលលើទ្រព្យសម្បត្តិបង្កករបស់រុស្ស៊ី មិនមែនយកពីអ្នកបង់ពន្ធអាមេរិកទេ។

ទីក្រុងវ៉ាស៊ីនតោន បានជំរុញសហភាពអឺរ៉ុប ឱ្យមានការធានាកាន់តែខ្លាំងថា ទឹកប្រាក់បង្កករបស់រុស្ស៊ីរាប់រយពាន់លានដុល្លារដែលគ្រប់គ្រងដោយឃ្លាំងមូលបត្រ យូរ៉ូឃ្លៀ (Euroclear) ជាចម្បងនៅបែលហ្ស៊ិក នឹងនៅតែជាប់គាំងក្នុងរយៈពេលយូរ ទោះបីជាមានបទឈប់បាញ់បញ្ចប់អរិភាពនៅអ៊ុយក្រែនក៏ដោយ។ វិធីសាស្រ្តនេះនឹងកាត់បន្ថយហានិភ័យដែលថាអ្នកជាប់ពន្ធរបស់អាមេរិក នឹងទទួលខុសត្រូវចំពោះការសងប្រាក់កម្ចីនោះ បើទ្រព្យរុស្ស៊ីឈប់ត្រូវបានបង្កក៕