​បាល់ទាត់៖ លោក Christopher Grant អ្នកចាត់ការ​ក្លិប​ព្រះខ័ន​រាជ​ស្វាយរៀងបាន​បង្ហាញ​អារម្មណ៍​រីករាយ ក្រោយ​ក្លិប​បាន​ឈាន​ដល់​កិច្ចព្រមព្រៀង​បន្ដ​កិច្ចសន្យា​ថ្មី​សម្រាប់​រដូវ​កាល​ឆ្នាំ​២០២២ ជាមួយ​បងប្អូន​បង្កើត​ជនជាតិ​កា​មេ​រ៉ូ​ន Jean Marie Privat និង Emmanuel ដោយ​លោក​មាន​សុទិដ្ឋិនិយម​ថា កិច្ចសន្យា​ថ្មី​នេះ​នឹង​ធ្វើ​ឲ្យ​ក្លិប​មានការ​ប្រកួតប្រជែង​កាន់​តែ​ខ្លាំង​ក្នុង​លី​គ​កំពូល​កម្ពុជា។​

​អ្នកចាត់ការ​ក្រុម​ជើងឯក​រង​ឆ្នាំ​ចាស់​ដដែលបាន​បញ្ជាក់ថា Privat គឺជា​ខ្សែប្រយុទ្ធ​ដ៏​ឆ្នើ​មួយរូប​នៅ​កម្ពុ​ជានា​ប៉ុន្មាន​រដូវ​កាល​ចុង​ក្រោយនេះ ហេតុនេះ​លោក​ពិតជា​រីករាយដែល​ម្ចាស់​ស្បែកជើង​មាស ២​សម័យកាល​រូបនេះបាន​ប្ដេជ្ញាចិត្ត​បន្ដ​រួមរស់​ជាមួយ​ក្លិប​នា​ឆ្នាំក្រោយ​ទៀត។​ ​ចំណែក Emmanuel ក៏​មិន​ខុសពី​បងប្រុស​របស់គេ​ដែរ ទោះបី​ខ្សែបម្រើ​-​ប្រយុទ្ធ​រូបនេះទើបតែ​ចូលរួម​ជាមួយ​ក្លិប​នៅ​ជើង​ទី​២។ ប៉ុន្ដែ​ផ្អែកលើ​ទម្រង់​លេង និង​សមត្ថភាពសម្រាប់​ការបង្ហាញ​ខ្លួន ៥​ប្រកួត​កន្លងមក កីឡាករ​មាន​បទពិសោធ​លេង​នៅ​អឺរ៉ុប​នេះបានបង្ហាញ​នូវ​គុណភាព​ដ៏​ល្អ​ដល់​ក្រុម​ទាំង​តំបន់​ប្រយុទ្ធ និង​ការពារ ហើយ​លោក​ជឿជាក់ថា Emmanuel នឹង​កាន់តែ​រីកចម្រើន​បន្ថែមទៀតនាពេលខាងមុខ។​ ​ផ្អែកលើ​សមត្ថភាព និង​ការខិតខំ​ប្រឹងរ​បស់បង​ប្អូនបង្កើត​ជនជាតិ​កា​មេ​រ៉ូ​ន​នេះ លោក Christopher Grant រំពឹងថា ការបន្ត​កិច្ចសន្យា​ជាមួយ​ខ្សែប្រយុទ្ធ​ឆ្នើម​ទាំង ២ នឹង​កាន់តែ​បង្ហាញថា ព្រះខ័ន​រាជ​ស្វាយរៀង​ពិតជា​មានការ​ប្រកួតប្រជែង​ខ្លាំង​ក្នុង​លី​គ​កំពូល​កម្ពុជា ហើយ​លោក​សង្ឃឹមថា អ្នកគាំទ្រ​នឹង​ឆាប់​បាន​ចូល​ទស្សនា​ជាថ្មីនា​រដូវ​កាល​ខាងមុខដើម្បី​ជា​ផ្នែក​មួយ​របស់​ក្លិប។​

​សូមបញ្ជាក់ថា ក្នុង​រដូវ​កាល​ឆ្នាំ​២០២១ នេះ Privat បានបញ្ចប់​ទី​គូប្រកួត​ចំនួន ១៥​គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​ស៊ុត​បញ្ចូល​ទី​(Assist) ៨​ដង ស្របពេល​ប្អូនប្រុស​របស់ខ្លួនដែល​ទើប​ចូល​លេង​នៅ​ជើង​ទី​២ Emmanuel រកបាន ២​គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម ២​ដង រួមចំណែក​ជួយ​ឲ្យ​ព្រះខ័ន​រាជ​ស្វាយរៀងមាន ៣៦​ពិន្ទុ និង​កំពុង​ឈ​រលេខ​រៀង​ទី​២ បណ្ដោះអាសន្ន៕

​អត្ថបទ៖ លី ឈុន​ឡា