គ្រូបង្រៀន និងនិស្សិតសាកលវិទ្យាល័យ បាននាំយកក្តារខៀននិងសៀវភៅកត់ត្រារបស់ពួកគេទៅកាន់ទីលាន Plaza de Mayo កាលពីថ្ងៃអង្គារ សម្រាប់ថ្នាក់រៀនសាលារដ្ឋ ដើម្បីតវ៉ាប្រឆាំងការកាត់បន្ថយថវិការបស់ប្រធានាធិបតីប្រទេសអាហ្សង់ទីន លោក Milei ។

ជាផ្នែកនៃការធ្វើកូដកម្មរបស់គ្រូបង្រៀនរយៈពេល៤៨ម៉ោង ដែលបានចាប់ផ្តើមតាំងពីថ្ងៃច័ន្ទ ទី២១ ខែតុលា ថ្នាក់រៀនសាលារដ្ឋចំនួន១០៩ថ្នាក់ និងសកម្មភាពអប់រំផ្សេងៗទៀត ត្រូវបានកំណត់ធ្វើ នៅទីលាន Plaza de Mayo ទល់មុខវិមានរដ្ឋាភិបាល ដែលត្រូវបានគេស្គាល់ថា Casa Rosada។

កាលពីដើមខែតុលា សភារបស់ប្រទេសអាហ្សង់ទីន បានបរាជ័យក្នុងការកែប្រែសិទ្ធវ៉េតូដ៏ចម្រូងចម្រាសរបស់លោក Milei ដែលនឹងទប់ស្កាត់ការចំណាយរបស់សាកលវិទ្យាល័យឲ្យស្របតាមអតិផរណា ដែលក្រោយមក មានការតវ៉ាទ្រង់ទ្រាយធំពីសំណាក់និស្សិត និងបុគ្គលិកសាកលវិទ្យាល័យប្រឆាំងនឹងវិធានការនេះ។

លោក Milei អះអាងថា ច្បាប់នេះនឹងធ្វើឱ្យប៉ះពាល់ដល់តុល្យភាពសារពើពន្ធ ដែលលោកបានជំរុញដើម្បីដោះស្រាយវិបត្តិសេដ្ឋកិច្ចជាយូរអង្វែងមកហើយ និងបានសន្យាថានឹងប្រើប្រាស់សិទ្ធវ៉េតូ សម្រាប់អ្វីដែលជាការគំរាមកំហែង។

ការចំណាយលើផ្នែកសុខភាព ប្រាក់សោធននិវត្តន៍ និងការសិក្សាអប់រំរបស់ប្រទេសអាហ្សង់ទីន បានទទួលរងផលប៉ះពាល់ខ្លាំងបំផុត ដោយសារតែការកាត់ផ្តាច់ផ្នែកសាធារណៈរបស់លោក Milei ។

ការរឹតត្បិតថវិកាដ៏តឹងតែងរបស់រដ្ឋបាល លោក Milei បានអូសបន្លាយពេលវិបត្តិសេដ្ឋកិច្ច និងបានបណ្តាលឱ្យអត្រានៃភាពក្រីក្រ កើនឡើងដល់ប្រហែល៥៣% ។