ប្រធានាធិបតីសហរដ្ឋអាមេរិក លោក Joe Biden បាននិយាយកាលពីថ្ងៃអង្គារ (២២ តុលា) ថា លោក Donald Trump មកពីគណបក្សសាធារណរដ្ឋ គឺជាការគំរាមកំហែងដល់លទ្ធិប្រជាធិបតេយ្យ ហើយគួរតែត្រូវបានចាប់ខ្លួន “តាមផ្លូវនយោបាយ” ខណៈលោកជំរុញអ្នកប្រជាធិបតេយ្យនៅការិយាល័យយុទ្ធនាការរដ្ឋ ញូវ ហែមសៀរ (New Hampshire) ឱ្យប្រឹងប្រែងដើម្បីឈ្នះឆ្នោតនៅថ្ងៃទី០៥ ខែវិច្ឆិកា។

លោក Biden បានថ្លែងថា “យើងត្រូវចាប់លោក Trump ដាក់ពន្ធនាគារតាមផ្លូវនយោបាយ! ចាប់លោកមិនឱ្យចេញទៅណារួច” ខណៈអ្នកចូលរួមទះដៃអបអរ។ លោក Biden បន្ថែមថា លោក Trump ដែលជាបេក្ខជនបក្សសាធារណរដ្ឋ និងជាអតីតប្រធានាធិបតី ចង់មិនអើពើលើការការពាររដ្ឋធម្មនុញ្ញរបស់សហរដ្ឋអាមេរិក ហើយលទ្ធិប្រជាធិបតេយ្យនឹងជាប់គាំង ប្រសិនបើលោក Trump ផ្តួលបេក្ខភាពបក្សប្រជាធិបតេយ្យ លោកស្រី Kamala Harris។

លោក Trump នៅពេលឈរឈ្មោះជាប្រធានាធិបតីក្នុងឆ្នាំ២០១៦ បានចូលរួមការប្រមូលផ្តុំយុទ្ធនាការដែលអ្នកចូលរួមបានស្រែកថា “ចាប់ខ្លួន” ដោយសំដៅទៅលើបេក្ខភាពបក្សប្រជាធិបតេយ្យនៅពេលនោះគឺលោកស្រី ហ៊ីឡារី ឃ្លីនតុន (Hillary Clinton) ប៉ុន្តែលោកមិនបញ្ឈប់ពួកគេឡើយ។

នៅឆ្នាំនេះ ក្នុងអំឡុងពេលជួបជុំយុទ្ធនាការរបស់លោកស្រី Harris ហ្វូងមនុស្សពេលខ្លះបានស្រែកថា “ចាប់ខ្លួន” ដោយសំដៅទៅលើ Trump ប៉ុន្តែអនុប្រធានាធិបតីរូបនេះបានបញ្ឈប់ពួកគេ ដោយនិយាយថាទុកឱ្យក្រសួងយុត្តិធម៌អ្នកធ្វើការ ហើយលោកស្រីនឹងព្យាយាមផ្តួលលោក Trump នៅក្នុងសន្លឹកឆ្នោត៕