នាយករដ្ឋមន្ត្រីអង់គ្លេស Keir Starmer បានព្រមានថា រុស្ស៊ីកំពុងបង្កើនការវាយប្រហារលើកំពង់ផែអ៊ុយក្រែន នៅសមុទ្រខ្មៅ ដោយពន្យារពេលការនាំចេញកសិផល ក្នុងនោះរួមទាំងជំនួយដែលត្រូវផ្ដល់ដល់ប្រជាជនប៉ាឡេស្ទីនដែលជាប់ក្នុងជម្លោះជាមួយអ៊ីស្រាអែល។

គួរបញ្ជាក់ថា ក្នុងអំឡុងពេលនៃការវាយប្រហារជាច្រើនថ្ងៃ នាដើមខែតុលា អាវុធរបស់រុស្ស៊ី បានវាយប្រហារត្រូវនាវាដឹកទំនិញយ៉ាងតិចចំនួន ៤គ្រឿង ដោយក្នុងនោះរួមមានទាំងនាវាមួយគ្រឿងដែលត្រូវបានគេរាយការណ៍ថា មានផ្ទុកពោតចំនួន ៦.០០០តោន។

លោក Starmer បាននិយាយថា ប្រធានាធិបតីរុស្ស៊ី លោក Vladimir Putin មានបំណង «លេងល្បែងជាមួយសន្តិសុខស្បៀងពិភពលោក ដែលជាការប៉ុនប៉ងរបស់លោក ដើម្បីបង្ខំឲ្យអ៊ុយក្រែនព្រមចុះចាញ់»។ ការថ្លែងបែបនេះរបស់លោកនាយករដ្ឋមន្ត្រីអង់គ្លេស បានកើតមានឡើងនៅពេលលោកធ្វើដំណើរទៅប្រទេសកោះប៉ាស៊ីហ្វិកសាម័រ ដើម្បីចូលរួមកិច្ចប្រជុំរបស់ប្រមុខរដ្ឋាភិបាលនៃបណ្ដាប្រទេស Commonwealth។

ក្នុងអំឡុងពេលនៃការវាយប្រហារជាច្រើនថ្ងៃ មីស៊ីលរបស់រុស្សី ដែលវាយប្រហារទៅលើតំបន់ Odesa បានត្រូវចំនាវាដែលបានចុះបញ្ជីនៅប៉ាណាម៉ា ហើយនាវាដឹកទំនិញដែលមានទង់ជាតិប្រទេសប៉ាឡូ ក៏ត្រូវបានវាយប្រហារផងដែរ ដោយបានសម្លាប់មនុស្សម្នាក់នៅលើនាវានោះ។

ការវាយប្រហារជាបន្តបន្ទាប់ នៅកំពង់ផែសមុទ្រខ្មៅរបស់អ៊ុយក្រែននេះ ក៏បានកើតឡើងផងដែរស្របពេលជាមួយនឹងដំណើរទស្សនកិច្ចនៅអឺរ៉ុបរបស់ប្រធានាធិបតីរុស្ស៊ី លោក Volodymyr Zelensky ដែលបានជួបមេដឹកនាំនៅទីក្រុងឡុងដ្រ៍ ប៉ារីស រ៉ូម និងប៊ែរឡាំង៕