ក្រុមហ៊ុនផលិតបន្ទះឈីប Taiwan Semiconductor Manufacturing Company (TSMC) របស់កោះតៃវ៉ាន់ បានជូនដំណឹងទៅសហរដ្ឋអាមេរិកថា បន្ទះឈីបមួយរបស់ខ្លួន ត្រូវបានរកឃើញនៅក្នុងផលិតផលរបស់ក្រុមហ៊ុន Huawei បន្ទាប់ពីក្រុមហ៊ុនស្រាវជ្រាវបច្ចេកវិទ្យា TechInsights បានបំបែកមើលផ្នែកខាងផលិតផលរបស់កក្រុមហ៊ុននេះ ហើយបានបង្ហាញពីការរំលោភដែលអាចមាន ជុំវិញការរឹតបន្តឹងការនាំចេញលើក្រុមហ៊ុនចិន។ នេះបើយោងតាមបុគ្គលដែលដឹងអំពីបញ្ហានេះ។

ប្រភពមួយទៀតបាននិយាយថា ដំណើរការបំបែកមើលសមាសធាតុខាងក្នុងនេះ គឺធ្វើឡើងចំពោះបន្ទះឈីប Ascend 910B របស់ក្រុមហ៊ុន Huawei។ Ascend 910B ត្រូវបានគេចាត់ទុកថា ជាបន្ទះឈីបបញ្ញាសិប្បនិម្មិត (AI) កម្រិតខ្ពស់បំផុតមួយរបស់ក្រុមហ៊ុនចិនមួយនេះ។ ប្រភពដំបូង នឹងមិនបង្ហាញឲ្យដឹងពីសមាសធាតុនោះទេ ប៉ុន្តែបាននិយាយថា បន្ទះឈីបរបស់ក្រុមហ៊ុន TSMC គឺជាបន្ទះឈីបមួយ នៅក្នុងប្រព័ន្ធពហុឈីប។

TechInsights បានជូនដំណឹងដល់ TSMC អំពីបន្ទះឈីបនេះ មុនពេលចេញផ្សាយការរកឃើញរបស់ខ្លួន នៅក្នុងរបាយការណ៍មួយ ដោយជំរុញឲ្យក្រុមហ៊ុនរបស់កោះតៃវ៉ាន់មួយនេះ ផ្ដល់ដំណឹងនេះដល់ក្រសួងពាណិជ្ជកម្មសហរដ្ឋអាមេរិក កាលពី ២-៣ សប្តាហ៍មុន។ TSMC បានឲ្យដឹងនៅក្នុងសេចក្តីថ្លែងការណ៍មួយកាលពីថ្ងៃចន្ទថា ខ្លួនបានចាប់ផ្ដើមទាក់ទងទៅក្រសួងពាណិជ្ជកម្ម ពាក់ព័ន្ធនឹងបញ្ហានេះ។ ក្រុមហ៊ុនបាននិយាយថា ខ្លួនមិនបានផ្គត់ផ្គង់បន្ទះឈីបទៅឲ្យក្រុមហ៊ុន Huawei ចាប់តាំងពីពាក់កណ្តាលខែកញ្ញាឆ្នាំ២០២០ មកម្ល៉េះ។

ក្រសួងពាណិជ្ជកម្មបានប្រាប់នៅក្នុងសេចក្តីថ្លែងការណ៍ថា ខ្លួន «ដឹងពីការរាយការណ៍ អំពីការរំលោភបំពានដែលអាចកើតមាននៃការត្រួតពិនិត្យការនាំចេញរបស់សហរដ្ឋអាមេរិក» ប៉ុន្តែមិនអាចធ្វើអត្ថាធិប្បាយជុំវិញថា តើការស៊ើបអង្កេតណាមួយ កំពុងបន្តមាន ឬក៏អត់នោះទេ៕