ក្រសួងការបរទេសរុស្ស៊ី កាលពីថ្ងៃអង្គារ (ទី២២ ខែតុលា) បាននិយាយថា ខ្លួនបានកោះអញ្ជើញឯកអគ្គរដ្ឋទូតអាល្លឺម៉ង់ ដើម្បីតវ៉ា ចំពោះការបង្កើតមជ្ឈមណ្ឌលបញ្ជាការកងទ័ពជើងទឹកថ្មីរបស់អង្គការសន្ធិសញ្ញាអាត្លង់ទិកខាងជើង ឬណាតូ ((NATO) នៅតាមបណ្តោយឆ្នេរសមុទ្របាល់ទិក។

កាលពីថ្ងៃចន្ទ (ទី២១ ខែតុលា) ប្រទេសអាល្លឺម៉ង់បានបើកសម្ពោធមជ្ឈមណ្ឌលនេះ ដើម្បីជាការបង្កើនការត្រៀមលក្ខណៈការពារ នៅក្នុងតំបន់សមុទ្របាល់ទិក ខណៈដែលរុស្ស៊ីបន្តធ្វើសង្រ្គាម នៅអ៊ុយក្រែន។

អាជ្ញាធរនៅទីក្រុងមូស្គូ បានប្រាប់ថា ពួកគេបានសម្តែងការតវ៉ាយ៉ាងដាច់អហង្ការជាមួយឯកអគ្គរដ្ឋទូតអាល្លឺម៉ង់ ជុំវិញការបង្កើតមជ្ឈមណ្ឌលបញ្ជាការកងទ័ពជើងទឹក នៅទីក្រុង Rostock។

ក្រសួងការបរទេសរុស្ស៊ី បាននិយាយថា៖ «សម្រាប់ក្រុងវ៉ាស៊ីនតោន ប៊្រុចសែល និងប៊ែរឡាំង ពួកគេត្រូវតែដឹងថា ការពង្រីកហេដ្ឋារចនាសម្ព័ន្ធយោធារបស់អង្គការណាតូ នៅអតីតអាល្លឺម៉ង់ខាងកើត នឹងមានផលអវិជ្ជមានខ្លាំងបំផុត»។ ទីក្រុងមូស្គូបានព្រមានថា ស្ថានការណ៍ «នឹងមិននៅដដែលដោយគ្មានការឆ្លើយតបយ៉ាងសមស្របពីភាគីរុស្ស៊ីនោះឡើយ»។

ជាមួយគ្នានេះ ក្រសួងការបរទេសរុស្ស៊ីក៏បានឲ្យដឹងផងដែរថា មជ្ឈមណ្ឌលថ្មីនេះ គឺជា «ការបំពានយ៉ាងជាក់ស្ដែង» នៃសន្ធិសញ្ញាបង្រួបបង្រួមអាល្លឺម៉ង់ឆ្នាំ១៩៩០ ដែលចែងថា គ្មានកងកម្លាំងប្រដាប់អាវុធបរទេសណាមួយ នឹងត្រូវបានដាក់ពង្រាយនៅក្នុងតំបន់នេះនោះទេ។

គួរបញ្ជាក់ថា មជ្ឈមណ្ឌលបញ្ជាការកងទ័ពជើងទឹក នឹងត្រូវដឹកនាំដោយឧត្តមនាវីឯកអាល្លឺម៉ង់ និងមានបុគ្គលិកមកពីប្រទេសចំនួន ១១ផ្សេងទៀតរបស់អង្គការណាតូ៕