​បាល់ទាត់៖ ​ឈាន​ចូល​វ័យ ៣៦​ឆ្នាំ​ទៅ​ហើយ Cristiano Ronaldo មិនបាន​បង្ហាញ​ពី​ការ​ស្រុត​ចុះ​នៃ​ការ​ស៊ុត​បញ្ចូល​ទី​របស់​ខ្លួន​ទៅតាម​វ័យ​របស់​គេ​ឡើយ បន្ទាប់ពី​ខ្សែប្រយុទ្ធ​ក្រុម​បិសាច​ក្រហម Manchester United រូបនេះ​ស៊ុត​បញ្ចូល​ទី​ ៣​គ្រាប់​ម្នាក់ឯង​ក្នុង​ជ័យជំនះ​របស់​ព័រទុយហ្កាល់ ៥-០ លើ​លុច​ហ្សាំ​បួរ​យប់មិញ​។

​​ពីរ​គ្រាប់ ១១ម៉ែត្រ​ពីរ​គ្រាប់​នៅ​ដើម​វគ្គ​ទី១ និង​មួយ​គ្រាប់​ចុង​វគ្គ​ទី២ ធ្វើឱ្យ Cristiano Ronaldo ក្លាយជា​កីឡាករ​បាល់ទាត់​ដែល​ស៊ុត​បាន Hat-Trick បាន​ច្រើនជាងគេ​នៅ​ក្រុម​ជំរើសជាតិ​។ ​នេះ​ជា Hat-Trick ទី៥៨ របស់គេ​សរុប​ទាំង​ក្រុម​ជំរើសជាតិ និង​ក្លិប​អាជីព​ដែល​មាន​ន័យថា ៥៨ប្រកួត​ដែល​កីឡាករ​វ័យ ៣៦ឆ្នាំ​រូបនេះ​រកបាន ៣គ្រាប់​រឺ​ច្រើនជាង​នេះ​ក្នុង​មួយ​ប្រកួត​។​ ​មិត្ត​រួម​ក្រុម Manchester United, Bruno Fernandes ក៏​រកបាន​មួយ​គ្រាប់​ផងដែរ​ជាមួយនឹង Joao Palhinha​។

​​Ronaldo ទើបបាន​បំបែក​កំណត់ត្រា​កីឡាករ​ស៊ុត​បញ្ចូល​ទី​ច្រើនជាងគេ​កាលពី​ខែ​មុន​របស់ Ali Daei ដែល​មាន ១០៩គ្រាប់ ខណៈពេល​នេះ Ronaldo មាន​សរុប ១១៥​គ្រាប់​ទៅហើយ​ឱ្យ​ក្រុម​ជំរើសជាតិ​។ ​ជ័យ​ជំនះ​របស់​ព័រទុយហ្កាល់​នេះ ធ្វើឲ្យក្រុម​របស់លោក Fernando Santos នៅតែ​បន្ត​ឈរ​លេខ២ ក្នុង​ពូ​ល​មាន ១៦ពិន្ទុ​នៅ​ពីក្រោម​ស៊ែ​ប​ដែលមាន ១៧ពិន្ទុ​បន្ទាប់ពី​យកឈ្នះ​អា​ស៊ែ​បៃ​សង់ ៣-១ យប់មិញ តែ​ស៊ែ​ប​មាន​មួយ​ប្រកួត​លើស​ព័រទុយហ្កាល់​៕

​អត្ថបទ​៖​នាង សុភា​វុ​ធ