រដ្ឋមន្រ្តីការបរទេសសហរដ្ឋអាមេរិកលោក Antony Blinken និយាយនៅថ្ងៃពុធនេះថា ឥឡូវវាដល់ពេលដែលត្រូវបញ្ចប់សង្រ្គាមហ្កាហ្សាហើយៗលោកបានជំរុញឲ្យអ៊ីស្រាអែល ចៀសវាងការធ្វើឲ្យឡើងកម្តៅបន្ថែមទៀតជាមួយអ៊ីរ៉ង់ ។

អ៊ីស្រាអែល កំពុងធ្វើសង្រ្គាមជាមួយក្រុមហាម៉ាស់គាំទ្រដោយអ៊ីរ៉ង់នៅតំបន់ហ្កាហ្សា និងក្រុមហេសបូឡានៅប្រទេសលីបង់ ហើយពួកគេបានសន្យាថា នឹងសងសឹកការវាយប្រហារដោយមីស៊ីលរបស់អ៊ីរ៉ង់កាលពីថ្ងៃទី ១ ខែតុលា ។

លោក Blinken បានជំរុញឲ្យបញ្ឈប់ការប្រយុទ្ធគ្នារវាងអ៊ីស្រាអែល និងក្រុមហាម៉ាស់ ហើយនិងក្រុមហេសបូឡា ប៉ុន្តែការវាយប្រហារតាមច្រកអាកាសលើទីក្រុងប្រវត្តិសាស្រ្ត Tyre របស់លីបង់ បង្ហាញថាគ្មានភាពធូរស្បើយនោះឡើយ ។

នៅថ្ងៃពុធនេះដែរ លោក Blinken បានធ្វើដំណើរទៅដល់ទីក្រុង Riyadh ហើយត្រូវបានស្វាគមន៍ដោយក្រុមមន្រ្តីអារ៉ាប៊ីសាអូឌីត និងឯកអគ្គរដ្ឋទូតសហរដ្ឋអាមេរិកប្រចាំនៅអារ៉ាប៊ីសាអូឌីតលោក Michael Ratney ។

ក្រោយមកលោកបានជួបជាមួយរដ្ឋមន្រ្តីក្រសួងការបរទេសអារ៉ាប៊ីសាអូឌីតគឺព្រះអង្គម្ចាស់ Faisal bin Farhan Al-Saud ។

ដំណើរទស្សនកិច្ចចុងក្រោយរបស់មន្រ្តីការទូតជាន់ខ្ពស់សហរដ្ឋអាមេរិករូបនេះ និងជាដំណើរទស្សនកិច្ចលើកទី ១១របស់លោកមកកាន់តំបន់ ចាប់តាំងក្រុមជីវពលហាម៉ាស់វាយប្រហារតំបន់ភាគខាងត្បូងអ៊ីស្រាអែល កាលពីថ្ងៃទី ៧ ខែតុលា ឆ្នាំមុន ជាហេតុបង្កឲ្យមានសង្រ្គាមនៅតំបន់ហ្កាហ្សាស្រ្ទីប បានធ្វើឡើង ស្របពេលដែលយោធាអ៊ីស្រាអែល នៅតែបង្កើនយុទ្ធនាការសឹករបស់ពួកគេនៅតំបន់ហ្កាហ្សា និងលីបង់ ដើម្បីប្រឆាំងនឹងក្រុមជីវពលហេសបូឡាគាំទ្រដោយអ៊ីរ៉ង់ ៕