​បាល់ទាត់៖ ​អតីត​អ្នកចាំទី​ក្រុម​បិសាច​ក្រហម Manchester United, Sergio Romero រកបាន​ទ្រនំ​ថ្មី​ហើយ​គឺ​ចូលរួម​ជាមួយក្លិប​អ៊ីតាលី Venezia FC នៅ​ក្របខណ្ឌ​អ៊ីតាលី Serie A ដោយ​គ្មាន​តម្លៃ​ផ្ទេរ​។ ​កីឡាករ​វ័យ ៣៤ឆ្នាំ​រូបនេះ​នៅ​ទំនេរ​ពី​អាជីព​បាល់ទាត់​តាំងពី​ចាក​ចេញពី Manchester United កាលពី​ខែ​កក្កដា​។

​​រយៈពេល ៦ឆ្នាំ​របស់​អ្នកចាំទី​អា​ហ្ស​ង់​ទីន​រូប​នេះ​នៅ Old Trafford មិនអាច​ងើប​ផុតពី​កៅអី​បម្រុង​ឡើយ​ដោយ​តែងតែ​ជា​អ្នកចាំទី​ដៃ​ទី​២ បន្ទាប់ពី David de Gea និង​ឈាន​ដល់ដៃ​ទី៣ ទៅទៀត​បន្ទាប់ពី Dean Henderson នៅ​រដូវ​កាល​មុន​។ ​Sergio Romero បង្ហាញខ្លួន​ចុងក្រោយ​បំផុត​ជាមួយ Manchester United ក្នុង​ការ​ប្រកួត​ក្រប​ខណ្ឌ UEFA Europa League វគ្គ ៨​ក្រុម​ចុងក្រោយ​រដូវ​កាល​មុន​កាលពី​ខែ​សីហា​ដែល​ឈ្នះ FC Copenhagen ១-០​។ ​ថ្វីបើ​មិន​មាន​កៅអី​ដំបូង​នៅ Manchester United តែ Romero គឺជា​អ្នកចាំទី​ដែល​បង្ហាញខ្លួន​បាន​ច្រើន​បំផុត​ឱ្យ​ក្រុម​ជំរើសជាតិ​អា​ហ្ស​ង់​ទីន​ដល់​ទៅ ៩៦​ប្រកួត​។​

Sergio Romero ដែល​ជួយ Manchester United ឈ្នះ​ពាន UEFA Europa League កាលពី​ឆ្នាំ​២០១៧ ក្រោម​ការដឹកនាំ​របស់​លោក Jose Mourinho នោះ​បាន​ស្ថិត​នៅ​ក្រៅ​ជំរើស​តាំងពី​ការ​មក​ដល់​របស់លោក Ole Gunnar Solskjaer និង​កាន់តែ​ក្រៅ​ជំរើស​ទៅទៀត​នៅពេល Dean Henderson ត្រលប់​មកពី Sheffield United រដូវ​កាល​មុន​។ ​​សរុប​រួម Romero បង្ហាញខ្លួន​ឱ្យ Manchester United បាន ៦១លើក រក្សា​ទី​មិន​ឱ្យ​របូត​គ្រាប់​បាល់​បាន ៣៩លើក​។ ​ចំណែក​ក្លិប​ថ្មី Venezia FC កំពុង​ឈរ​លេខ១៧ នៅ​ក្របខណ្ឌ​លី​គ​កំពូល​អ៊ីតាលី Serie A ដោយ​មានតែ ៥ពិន្ទុ​ប៉ុណ្ណោះ​ពី​ការប្រកួត ៧លើក​៕

​អត្ថបទ​៖​នាង សុភា​វុ​ធ