មេដឹកនាំពិភពលោកបានអំពាវនាវឱ្យមានសន្តិភាពនៅមជ្ឈិមបូព៌ា និងអ៊ុយក្រែន នៅឯកិច្ចប្រជុំកំពូលក្រុមប្រទេស BRICS ក្នុងប្រទេសរុស្ស៊ីកាលពីថ្ងៃពុធសប្ដាហ៍នេះ ខណៈលោកប្រធានាធិបតី Vladimir Putin បានតបវិញថា លោកស្វាគមន៍ការផ្តល់ជូនក្នុងការសម្របសម្រួលបញ្ចប់ជម្លោះអ៊ុយក្រែន។

មេដឹកនាំរុស្ស៊ី កំពុងបង្ហាញការជួបជុំនេះជាសញ្ញាមួយដែលថាការប៉ុនប៉ងរបស់លោកខាងលិចដើម្បីដាក់ឲ្យទីក្រុងមូស្គូឯកានោះ បានបរាជ័យ ប៉ុន្តែបានប្រឈមនឹងការអំពាវនាវដោយផ្ទាល់ដើម្បីបញ្ចប់ជម្លោះអ៊ុយក្រែនពីដៃគូជិតស្និទ្ធ និងសំខាន់បំផុតមួយចំនួនរបស់លោកPutin។

កិច្ចប្រជុំរបស់មេដឹកនាំពិភពលោកប្រហែល ២០ ប្រទេសនៅកណ្តាលទីក្រុង កាហ្សាន (Kazan) គឺជាវេទិកាការទូតដ៏ធំបំផុតនៅក្នុងប្រទេសរុស្ស៊ីចាប់តាំងពីលោកPutin បានបញ្ជាឱ្យកងទ័ពចូលទៅក្នុងអ៊ុយក្រែនក្នុងឆ្នាំ ២០២២ ។

ដោយការចាប់ផ្ដើមបង្កើតប្លុកBRICSនេះកាលពីឆ្នាំ ២០០៩ ប្លុកនេះមានចំនួនសមាជិកត្រឹម៤ប្រទេសប៉ុណ្ណោះ គឺប្រេស៊ីល រុស្ស៊ី ឥណ្ឌា និងចិន។ចាប់តាំងពីពេលនោះមក BRICS បានពង្រីកខ្លួនដើម្បីរួមបញ្ចូលប្រទេសដែលកំពុងរីកចម្រើនផ្សេងទៀតដូចជាអាហ្វ្រិកខាងត្បូង អេហ្ស៊ីប និងអ៊ីរ៉ង់។

លោកប្រធានាធិបតីចិន Xi Jinping បានប្រាប់កិច្ចប្រជុំកំពូលនេះថា មិនត្រូវឲ្យមានការប្រយុទ្ធគ្នាកាន់តែខ្លាំងថែមទៀតនៅអ៊ុយក្រែនឡើយ។

លោក Xi បាននិយាយថា យើងត្រូវតែប្រកាន់ខ្ជាប់នូវគោលការណ៍ចំនួនបី គឺកុំឱ្យជម្លោះហៀរចេញពីសមរភូមិ គ្មានការកើនឡើងនៃការប្រយុទ្ធគ្នា និងកុំបន្ថែមប្រេងលើភ្លើងពីសំណាក់ភាគីពាក់ព័ន្ធដើម្បីសម្រាលស្ថានការណ៍ឱ្យបានធូរស្រាលឆាប់តាមដែលអាចធ្វើទៅបាន៕