បុគ្គលិកផ្នែកដឹកជញ្ជូននៅប្រទេសបូលីវី បានបិទផ្លូវក្នុងទីក្រុង La Paz កាលពីថ្ងៃពុធ ដោយតវ៉ាប្រឆាំងប្រធានាធិបតី លោក លូអ៊ីស អាស(Luis Arce) ជុំវិញការខ្វះប្រេងឥន្ធនៈដែលនៅតែបន្ត បណ្តាលឱ្យមានការតម្រង់ជួរដ៍វែង នៅស្ថានីយ៍ប្រេងឥន្ធនៈ នៅទូទាំងទីក្រុង។

អ្នកបើកបរ បានចតយានយន្តរបស់ពួកគេនៅទូទាំងផ្លូវសំខាន់ៗ ដោយបង្ខំអ្នកស្រុកឱ្យដើរជាច្រើនគីឡូម៉ែត្រ តាមមហាវិថីជាច្រើនកន្លែង ដើម្បីបានទៅដល់គោលដៅរបស់ពួកគេ។

សហជីពដឹកជញ្ជូនសាធារណៈរបស់ទីក្រុង បានអំពាវនាវឱ្យបិទចរាចរណ៍រថយន្តរយៈពេល២៤ម៉ោង ដើម្បីឆ្លើយតបទៅនឹងវិបត្តិប្រេងឥន្ធនៈ។

កង្វះប្រេង ទាំងប្រេងសាំងនិងប្រេងម៉ាស៊ូត បានធ្វើឱ្យប្រជាជនត្រូវរង់ចាំរហូតដល់៤៨ម៉ោង ដើម្បីចាក់ប្រេង ដែលធ្វើឲ្យរំខានដល់ជីវភាពប្រចាំថ្ងៃយ៉ាងខ្លាំង។

រដ្ឋាភិបាលប្រទេសបូលីវី បានដាក់កំហុសកង្វះប្រេងឥន្ធនៈលើការបិទផ្លូវនៅតំបន់ភាគកណ្តាល ធ្វើឡើងដោយក្រុមអ្នកគាំទ្រអតីតប្រធានាធិបតី លោក អ៊ីវ៉ូ ម៉ូរ៉លឡេស(Evo Morales) ដែលកំពុងទាមទារឱ្យបញ្ចប់ការស៊ើបអង្កេតលើលោក Morales ចំពោះការចោទប្រកាន់ថា បានបំពានលើអនីតិជន ក្នុងអំឡុងពេលកាន់តំណែងប្រធានាធិបតីរបស់លោក។

ចាប់តាំងពីថ្ងៃទី១៤ ខែតុលា ក្រុមអ្នកគាំទ្រលោក Morales បានគ្រប់គ្រងផ្លូវហាយវ៉េសំខាន់ៗ ដែលតភ្ជាប់ទីក្រុង Cochabamba ជាមួយទីក្រុង La Paz, Oruro, Sucre, Potosi និងទីក្រុង Santa Cruz ។ សកម្មភាពទាំងនេះ បានរំខានយ៉ាងខ្លាំងដល់ខ្សែច្រវ៉ាក់ផ្គត់ផ្គង់ប្រេងឥន្ធនៈ និងទំនិញសំខាន់ៗផ្សេងទៀត។ រដ្ឋាភិបាលរបស់លោក Arce បានប៉ាន់ប្រមាណថា ការបិទផ្លូវបានធ្វើឲ្យខាតបង់ប្រាក់១៩១លានដុល្លារ។