រដ្ឋមន្ត្រីការបរទេសអាមេរិក លោក Antony Blinken បានមកដល់ទីក្រុងរីយ៉ាដ ( Riyadh) កាលពីថ្ងៃពុធ ២៣ តុលា ហើយត្រូវបានស្វាគមន៍ដោយក្រុមមន្ត្រីអារ៉ាប៊ីសាអ៊ូឌីត និងឯកអគ្គរដ្ឋទូតសហរដ្ឋអាមេរិកប្រចាំនៅអារ៉ាប៊ីសាអ៊ូឌីត លោក Michael Ratney និងបានជួបពិភាក្សាជាមួយរដ្ឋមន្ត្រីការបរទេសព្រះអង្គម្ចាស់ Faisal bin Farhan ក្រោយបញ្ចប់ជំនួបជាមួយមេដឹកនាំអ៊ីស្រាអែល។

អ្នកនាំពាក្យក្រសួងការបរទេសលោក Matthew Miller បាននិយាយថា ក្រុមមន្ត្រីទាំងនោះបានពិភាក្សាអំពីតម្រូវការបន្ទាន់ដើម្បីបញ្ចប់សង្រ្គាមនៅដែនដីហ្កាហ្សា និងដោះលែងចំណាប់ខ្មាំងទាំងអស់ពីក្រុមហាម៉ាសក៏ដូចជាមធ្យោបាយនៃការបង្កើតសន្តិសុខ អភិបាលកិច្ច និងការកសាងឡើងវិញបន្ទាប់ពីជម្លោះ។

ប្រព័ន្ធផ្សព្វផ្សាយរដ្ឋបាននិយាយថា Blinken ក៏បានជួបព្រះអង្គម្ចាស់ Mohammed bin Salman ដែលជាមេដឹកនាំតាមជាក់ស្ដែងរបស់ប្រទេសអារ៉ាប៊ីសាអ៊ូឌីត ដោយពុំបានបញ្ជាក់លម្អិត។

លោក Blinken បានជំរុញកាលពីថ្ងៃពុធសម្រាប់ការបញ្ឈប់ការប្រយុទ្ធគ្នារវាងអ៊ីស្រាអែល និងក្រុមសកម្មប្រយុទ្ធ ហាម៉ាស និង ហេសបូឡា ប៉ុន្តែការវាយប្រហារតាមអាកាសយ៉ាងចាស់ដៃរបស់អ៊ីស្រាអែលទៅលើទីក្រុងកំពង់ផែប្រវត្តិសាស្ត្រដ៏ធំមួយរបស់លីបង់បង្ហាញថាពុំមានការបន្ធូរដៃឡើយ។

លោក Blinken ដែលបានធ្វើដំណើរទៅកាន់មជ្ឈិមបូព៌ាជាទៀងទាត់ចាប់តាំងពីការផ្ទុះឡើងនៃសង្រ្គាម គឺជាដំណើរលើកដំបូងរបស់លោកចាប់តាំងពីអ៊ីស្រាអែលបានសម្លាប់មេដឹកនាំក្រុមហាម៉ាសលោក Yahya Sinwar កាលពីសប្តាហ៍មុន ដែលទីក្រុងវ៉ាស៊ីនតោនសង្ឃឹមថាអាចផ្តល់នូវកម្លាំងរុញច្រានថ្មីមួយសម្រាប់កិច្ចចរចាសន្តិភាព។

រដ្ឋមន្ត្រីការបរទេសហ្ស៊កដានីបាននិយាយថា ដំណើរទស្សនកិច្ចរបស់លោក Blinken ទៅកាន់ប្រទេសហ្ស៊កដានី ដែលបានគ្រោងទុកសម្រាប់ថ្ងៃពុធសប្ដាហ៍នេះ ត្រូវបានពន្យារពេល ដោយពុំបានផ្តល់ហេតុផល ឬកាលបរិច្ឆេទកំណត់ឡើងវិញនោះទេ៕