អ្នកបើកបររថយន្តក្រុងនៅក្នុងប្រទេសប៉េរូ ដែលខឹងសម្បារចំពោះការវាយប្រហារដ៏ហិង្សា និងការជំរិតទារប្រាក់ បានបន្តធ្វើកូដកម្មកាលពីថ្ងៃពុធ (២៣ តុលា) ជាលើកទីបីក្នុងរយៈពេលតិចជាងមួយខែ ដោយបង្កការរំខានយ៉ាងខ្លាំងដល់រដ្ឋធានីរបស់ប្រទេស ខណៈរដ្ឋាភិបាលបានចាត់វិធានការដើម្បីលុបបំបាត់ក្ដីបារម្ភចំពោះការកើនឡើងនៃអត្រាឧក្រិដ្ឋកម្ម។

ទាហានត្រូវបានដាក់ពង្រាយនៅទូទាំងទីក្រុងលីម៉ា ទាំងព្រឹកព្រលឹមដើម្បីរក្សាសណ្តាប់ធ្នាប់ ខណៈអ្នកស្រុកពិបាកទៅដល់កន្លែងធ្វើការដោយសាររថយន្តក្រុងមិនដំណើរការមកពីអ្នកបើកបរចេញធ្វើកូដកម្មអស់ ដោយអ្នកខ្លះជ្រើសរើសជិះរថយន្តឈ្នួលដែលមានតម្លៃថ្លៃ។

រលកនៃការជំរិតទារប្រាក់ បានបង្ខំរដ្ឋាភិបាលប៉េរូ កាលពីខែមុន ឱ្យប្រកាសស្ថានភាពអាសន្ននៅក្នុងផ្នែកភាគច្រើននៃរដ្ឋធានី ដែលមានប្រជាជនជាង ១០លាននាក់ ប៉ុន្តែអ្នករៀបចំកូដកម្ម បាននិយាយកាលពីថ្ងៃពុធថា រដ្ឋាភិបាលមិនទាន់ធ្វើគ្រប់គ្រាន់នៅឡើយទេ។ ផ្សារពេញនិយមមួយចំនួនក៏បានបិទទ្វារផងដែរដើម្បីគាំទ្រការតវ៉ានេះ។

ប្រធានាធិបតីប៉េរូ លោកស្រី ឌីណា បូលូអាតតេ (Dina Boluarte) កាលពីថ្ងៃពុធ បានសន្យាថា អាជ្ញាធរនឹងចាប់មេក្រុមឧក្រិដ្ឋជនមកដាក់ទោសឱ្យបានឆាប់រហ័ស ដោយព្រមានថា ការតវ៉ានឹងមិនធ្វើឱ្យសន្តិសុខប្រសើរឡើងនោះឡើយ៕