ក្រុមប្រឹក្សាសន្តិសុខជាតិរបស់ប្រទេសអ៊ីស្រាអែល កាលពីថ្ងៃពុធ ទី២៣ ខែតុលា បានអំពាវនាវឱ្យពលរដ្ឋរបស់ខ្លួន ចាកចេញជាបន្ទាន់ពីតំបន់ទេសចរណ៍មួយចំនួននៅភាគខាងត្បូងប្រទេសស្រីលង្កា ជុំវិញការគំរាមកំហែងនៃការវាយប្រហារភេរវកម្ម ដែលអាចកើតមាន។

ទីភ្នាក់ងារ និយាយថា មានការព្រមានទាក់ទងទៅនឹងតំបន់ Arugam Bay និងឆ្នេរសមុទ្រនៅភាគខាងត្បូង និងខាងលិចប្រទេសស្រីលង្កា ហើយផ្តើមចេញពី «ព័ត៌មានបច្ចុប្បន្ន អំពីការគំរាមកំហែងភេរវកម្ម ដែលបានដាក់គោលដៅលើតំបន់ទេសចរណ៍ និងឆ្នេរសមុទ្រច្រើនទីតាំង»។

ក្រុមប្រឹក្សាសន្តិសុខ ពុំបានបញ្ជាក់ពីលក្ខណៈពិតប្រាកដនៃការគំរាមកំហែងនេះទេ ហើយបានអំពាវនាវឱ្យប្រជាជនអ៊ីស្រាអែលនៅក្នុងប្រទេសស្រីលង្កា ឱ្យមានការប្រុងប្រយ័ត្ន និងចៀសវាងការជួបជុំក្នុងទ្រង់ទ្រាយធំ នៅតាមទីសាធារណៈ។

សន្តិសុខនគរបាល ត្រូវបានបង្កើននៅក្នុងតំបន់ ហើយមន្ត្រីស្ថិតក្នុងការប្រុងប្រយ័ត្នខ្ពស់។

ជាមួយគ្នានេះ ស្ថានទូតអាមេរិកប្រចាំប្រទេសស្រីលង្កា ក៏បានចេញផ្សាយការព្រមានផ្នែកសន្តិសុខដោយបញ្ជាក់ថា ខ្លួនបានទទួល «ព័ត៌មាននៃការព្រមានគួរឱ្យទុកចិត្តចំពោះការវាយប្រហារដែលដាក់គោលដៅលើទីតាំងទេសចរណ៍ដ៏ពេញនិយម នៅក្នុងតំបន់ Arugam Bay»។

ក្រសួងការបរទេសអាល្លឺម៉ង់ ក៏បានជំរុញអ្នកធ្វើដំណើរឱ្យជៀសវាងតំបន់នោះ ឬចាកចេញពីទីនោះឱ្យបានឆាប់តាមដែលអាចធ្វើទៅបាន ដោយលើកឡើងពី «ព័ត៌មានជុំវិញការវាយប្រហារដែលអាចកើតមានលើគោលដៅទេសចរណ៍»។

ទិន្នន័យរបស់រដ្ឋាភិបាលរបស់ប្រទេសបានបង្ហាញថា ក្នុងរយៈពេលប្រាំបីខែដំបូងនៃឆ្នាំនេះ ភ្ញៀវទេសចរ ចំនួន១,៥លាននាក់ បានទៅដល់ប្រទេសស្រីលង្កា រួមទាំងចំនួនសរុប២០.៥១៥នាក់ មកពីប្រទេសអ៊ីស្រាអែល។