ប្រជាជនប៉ាឡេស្ទីនបានប្រមូលផ្តុំគ្នានៅហាងនំប៉័ងមួយកន្លែងក្នុងទីក្រុង Khan Younis នៃដែនដីហ្កាហ្សា កាលពីថ្ងៃពុធ ២៣ តុលា ដើម្បីដណ្ដើមគ្នាយកនំប៉័ង ដោយគ្រួសារខ្លះនិយាយថា ពួកគេត្រូវរង់ចាំរាប់ម៉ោង ហើយពេលខ្លះត្រូវដើរចេញដោយដៃទទេ។

ការវាយប្រហារឥតឈប់ឈរពីសំណាក់អ៊ីស្រាអែលបានឆក់យកជីវិតមនុស្សជាង ៤២.៧៩០នាក់ និងរាប់ពាន់នាក់ត្រូវគេជឿថាជាប់ក្រោមគំនរកម្ទេចថ្ម និងបង្ខំឲ្យមនុស្សភាគច្រើនក្នុងចំណោមប្រជាជនហ្កាហ្សា២,៣លាននាក់ រត់ភៀសខ្លួន។

ទីភ្នាក់ងារអភិវឌ្ឍន៍របស់អង្គការសហប្រជាជាតិបាននិយាយកាលពីថ្ងៃអង្គារទី ២២ ខែតុលាថា សង្រ្គាមរវាងអ៊ីស្រាអែល និងក្រុមហាម៉ាស បានបំផ្លិចបំផ្លាញសេដ្ឋកិច្ចប៉ាឡេស្ទីន ហើយបានធ្វើឱ្យប្រជាជនស្ទើរតែទាំងអស់នៃតំបន់ហ្កាហ្សាធ្លាក់ក្នុងភាពក្រីក្រ ជាមួយនឹងសូចនាករគុណភាពនៃជីវិតដូចជាសុខភាព និងការអប់រំបានធ្លាក់ចុះក្នុងរយៈពេល៧០ឆ្នាំមកនេះ។

បុរសវ័យចំណាស់ម្នាក់ដែលបានរត់ភៀសខ្លួនពីការវាយប្រហាររបស់អ៊ីស្រាអែលនិងគ្មានប្រាក់ចំណូលរយៈពេល១០ខែមកនេះរៀបរាប់ថា គ្មានម្សៅលក់នៅផ្សារទេ។ ម្សៅមួយកញ្ចប់មានតម្លៃជាង២០០សេកែល ស្មើ៥២,៧១ដុល្លារអាមេរិក ។តើយើងអាចរកពីណាបាន?។លោកបានបន្ថែមថាពេលខ្លះ យើងទទួលបាននំប៉័ងមួយកញ្ចប់ ហើយពេលខ្លះត្រូវត្រឡប់ទៅវិញដោយដៃទទេ។

ពលរដ្ឋម្នាក់ទៀត និយាយថា ខ្ញុំទុកកូនចោលកន្លះថ្ងៃ ចាប់ពីម៉ោង ៨ ព្រឹក ដល់ម៉ោង ៣ រសៀល ដើម្បីទទួលបាននំបុ័ងមួយកញ្ចប់ ដោយត្រូវឈរចាំនិងប្រជ្រៀតគ្នាក្នុងចំណោមហ្វូងមនុស្សដ៏ច្រើន។អ្នកឃ្លាំមើលពិភពលោកបាននិយាយកាលពីថ្ងៃព្រហស្បតិ៍១៧តុលាថាតំបន់ ហ្កាហ្សាស្ទ្រីបទាំងមូលនៅតែស្ថិតក្នុងហានិភ័យនៃគ្រោះទុរ្ភិក្ស និងកំពុងជួបប្រទះកម្រិតនៃភាពអត់ឃ្លានក្នុងគ្រាអាសន្ន ខណៈប្រតិបត្តិការយោធាអ៊ីស្រាអែលដ៏ខ្លាំងក្លា បានបន្ថែមការព្រួយបារម្ភ និងរារាំងការដឹកជញ្ជូនជំនួយមនុស្សធម៌៕