កងទ័ពអ៊ីស្រាអែល កាលពីថ្ងៃពុធ (២៣ តុលា) បានចោទប្រកាន់អ្នកកាសែតរបស់សារព័ត៌មាន អាល់ ចាហ្ស៊ីរ៉ា (Al Jazeera) ចំនួន ៦នាក់ ដែលរាយការណ៍អំពីសង្គ្រាមនៅតំបន់ហ្កាហ្សា ថាជាអ្នកប្រយុទ្ធបច្ចុប្បន្ន ឬអតីតអ្នកប្រយុទ្ធស៊ីឈ្នួលឱ្យក្រុមសកម្មប្រយុទ្ធប៉ាឡេស្ទីន ខណៈ Al Jazeera បានច្រានចោលការអះអាងនេះ។

អ៊ីស្រាអែល បានសម្អាងដល់ឯកសារដែលត្រូវរាយការណ៍ថារកឃើញនៅក្នុងតំបន់ហ្កាហ្សា និងចារកម្មសម្ងាត់ផ្សេងទៀតដែលខ្លួនប្រមូលបាន ក្នុងការចោទប្រកាន់អ្នកសារព័ត៌មានដែលសុទ្ធតែជាបុរសជនជាតិប៉ាឡេស្ទីនទាំងនោះ។

ក្នុងចំណោមអ្នកទាំង ៦នាក់នោះ អ៊ីស្រាអែល ចោទថាមនុស្ស ៤នាក់រួមមានឈ្មោះ អាណាស អាល់-សារីហ្វ (Anas al-Sharif), ហូសាម សាបាត (Hossam Shabat), អ៊ីស្មែល អាប៊ូ អូម៉ា (Ismael Abu Omar), និង តាឡា អារូគី (Talal Arrouki) មានទំនាក់ទំនងជាមួយក្រុមហាម៉ាស ហើយពីរនាក់ទៀតឈ្មោះ អាស្រាហ្វ សារ៉ាច (Ashraf Saraj) និង អាឡា សាឡាមេ (Alaa Salameh) ត្រូវបានចោទថាមានទំនាក់ទំនងជាមួយក្រុមជីហាដអ៊ីស្លាម។

ប្រព័ន្ធផ្សព្វផ្សាយ Al Jazeera និយាយថា ការចោទប្រកាន់នេះត្រូវបាន “បង្កើតឡើង” និង “ជាផ្នែកនៃគំរូដ៏ធំទូលាយនៃអរិភាព” ចំពោះបណ្តាញព័ត៌មានអារ៉ាប់ ដោយបន្ថែមថា ការអះអាងនេះគឺជា “ការប៉ុនប៉ងដោយឥតលាក់លៀមដើម្បីបំបិទមាត់អ្នកកាសែតដែលនៅសេសសល់តិចតួចនៅតំបន់នេះ ក្នុងបំណងបិទបាំងការពិតដ៏អាក្រក់នៃសង្រ្គាមមិនឱ្យពិភពលោកបានដឹង”។

Al Jazeera មានមូលដ្ឋាននៅក្នុងប្រទេសកាតា ជាទីដែលមន្ត្រីជាន់ខ្ពស់របស់ក្រុមហាម៉ាស ជាច្រើនក៏មានមូលដ្ឋាននៅទីនោះ។ ប្រទេសអារ៉ាប់ឈូងសមុទ្រ ដែលផ្តល់មូលនិធិដល់ Al Jazeera មួយនេះ ក៏ជាតួអង្គសំខាន់ក្នុងការចរចាបទឈប់បាញ់ហ្កាហ្សា រួមជាមួយនឹងសហរដ្ឋអាមេរិក និងអេហ្ស៊ីបផងដែរ៕