ចក្រភពអង់គ្លេស និងប្រទេសអាល្លឺម៉ង់ បានបញ្ចប់កិច្ចព្រមព្រៀងការពារជាតិ ដើម្បីពង្រឹងការរៀបចំសន្តិសុខអឺរ៉ុប ខណៈការវាយលុករបស់រុស្ស៊ី លើអ៊ុយក្រែននៅតែបន្ត។ រដ្ឋមន្ត្រីការពារជាតិអង់គ្លេស លោក John Healey និងរដ្ឋមន្ត្រីការពារជាតិអាល្លឺម៉ង់ លោក Boris Pistorius បានចុះហត្ថលេខាលើកិច្ចព្រមព្រៀងនៅក្នុងទីក្រុងឡុងដ៍កាលពីថ្ងៃពុធ និងបានចេញសេចក្តីថ្លែងការណ៍រួមមួយ។

កិច្ចព្រមព្រៀងនេះ មានគោលបំណងបង្កើនការទប់ស្កាត់ប្រឆាំងរុស្ស៊ី។

ប្រទេសទាំងពីរ បាននិយាយថា ពួកគេនឹងសហការក្នុងការបន្តដើម្បីធានាឱ្យអ៊ុយក្រែន មានសមត្ថភាពផ្នែកយោធាដែលប្រទេសនេះបានទាមទារ។ រដ្ឋមន្ត្រីរបស់ប្រទេសទាំងពីរនិយាយថា ពួកគេនឹងរួមគ្នាផលិតមីស៊ីលរយៈចម្ងាយឆ្ងាយ និងយានដ្រូន។

និយាយអំពីការផលិតមីស៊ីលរួមគ្នា សារព័ត៌មានអង់គ្លេសមួយបានរាយការណ៍ថា សម្ព័ន្ធមិត្តនេះ ស្រមៃថា អាវុធនឹងអាចបាញ់បានឆ្ងាយដល់ទីក្រុងមូស្គូ ក្នុងករណីដែលលោក ពូទីន សម្រេចចិត្តបាញ់អាវុធនុយក្លេអ៊ែរតាកទិក។

និយាយពីកិច្ចសហប្រតិបត្តិការកងទ័ពជើងទឹកទ្វេភាគី សេចក្តីថ្លែងការណ៍និយាយថា យន្តហោះល្បាតដែនសមុទ្ររបស់អាល្លឺម៉ង់ នឹងត្រូវបានដាក់ពង្រាយក្នុងប្រទេសអង់គ្លេស ដើម្បីបង្កើនការឃ្លាំមើលនាវាមុជទឹក នៅសមុទ្រអាត្លង់ទិកខាងជើង និងសមុទ្រខាងជើង។

កិច្ចព្រមព្រៀងនេះធ្វើឡើង នៅមុនការបោះឆ្នោតប្រធានាធិបតីរបស់សហរដ្ឋអាមេរិក ក្នុងខែវិច្ឆិកា។ អង្គការសន្ធិសញ្ញាអាត្លង់ទិកខាងជើង(NATO) គឺជាសសរស្តម្ភសម្រាប់សន្តិសុខអឺរ៉ុប ប៉ុន្តែមានការព្រួយបារម្ភថា ការចូលរួមរបស់សហរដ្ឋអាមេរិកនៅក្នុងអង្គការណាតូ អាចនឹងចុះខ្សោយ ដោយអាស្រ័យលើលទ្ធផលនៃបោះឆ្នោត។