ការិយាល័យប្រព័ន្ធផ្សព្វផ្សាយដែលគ្រប់គ្រងដោយក្រុមហាម៉ាស បានឲ្យដឹងកាលពីថ្ងៃពុធថា ប្រតិបត្តិការយោធាអ៊ីស្រាអែល នៅក្នុងជំរំJabalia និងតំបន់ជុំវិញរបស់ខ្លួន នៅភាគខាងជើងតំបន់ហ្កាហ្សាស្ទ្រីប បានសម្លាប់ជនជាតិប៉ាឡេស្ទីនជាង ៧៧០នាក់ ក្នុងរយៈពេល ១៩ថ្ងៃ កន្លងទៅនេះ។

ការិយាល័យនេះ បាននិយាយនៅក្នុងសេចក្តីថ្លែងការណ៍មួយថា ប្រតិបត្តិការដែលកំពុងបន្ត បានបង្កឲ្យមនុស្សជាង១.000 នាក់ផ្សេងទៀតរង របួស និងបានធ្វើឲ្យមនុស្សរាប់សិបនាក់ បាត់ខ្លួន ខណៈដែលជនស៊ីវិលជាច្រើន ត្រូវបានឲ្យជម្លៀសចេញពីផ្ទះសម្បែង និងសង្កាត់លំនៅឋានរបស់ពួកគេ ដោយបង្ខំ។

ប្រជាជនដែលអ្នករបួស និងឈឺនៅភាគខាងជើងតំបន់ហ្កាហ្សាស្ទ្រីប ត្រូវការការថែទាំសុខភាព និងការថែទាំផ្នែកវេជ្ជសាស្ត្រជាបន្ទាន់ និងឆាប់រហ័ស ប៉ុន្តែបច្ចុប្បន្នមិនទាន់អាចទទួលបានទេ ដោយសារតែការបំផ្លិចបំផ្លាញនៃប្រព័ន្ធសុខាភិបាល និងកង្វះការផ្គត់ផ្គង់ផ្នែកវេជ្ជសាស្ត្រ។

ទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅដើមបូព៌ា (UNRWA) បាននិយាយនៅលើវេទិកាប្រព័ន្ធផ្សព្វផ្សាយសង្គម X កាលពីថ្ងៃពុធថា អំពើហិង្សាដែលកំពុងកើនឡើង បានបង្ខំឲ្យបុគ្គលិកUN ពន្យារពេលការចាក់ថ្នាំបង្ការជំងឺស្វិតដៃជើង នៅតំបន់ហ្កាហ្សាភាគខាងជើង។

ទីភ្នាក់ងារនេះ បានបន្ថែមថា៖«ប្រជាជនកំពុងរស់នៅក្នុងសុបិនអាក្រក់ រយៈពេលជាច្រើនសប្តាហ៍ដោយស្ទើរតែគ្មានអាហារ ទឹក ឬជំនួយ។ មនុស្សជាច្រើន បានជាប់នៅក្រោមគំនរបាក់បែក»។ «ការចាត់វិធានការជាបន្ទាន់ គឺត្រូវបានទាមទារ ដើម្បីឲ្យវ៉ាក់សាំងទៅដល់កុមារ និងទប់ស្កាត់កុំឲ្យមានសោកនាដកម្មបន្ថែមទៀត»។