មន្ត្រីរដ្ឋាភិបាលក្នុងតំបន់បានប្រាប់សារព័ត៌មានស៊ីនហួថា កាលពីថ្ងៃពុធ ក្រុមហ៊ួទី បានបើកការវាយប្រហារដោយយានដ្រូនលើសាលារៀនមួយ ក្នុងទីក្រុង Taiz ភាគនិរតីនៃប្រទេសយេម៉ែន ដោយបាន    បណ្តាលឲ្យសិស្ស ៤នាក់ រងរបួស។  

មន្ត្រីរូបនេះ បាននិយាយក្នុងលក្ខខណ្ឌមិនបញ្ចេញឈ្មោះថា៖«ការវាយប្រហារដោយយានដ្រូនេះ បានកំណត់គោលដៅលើសាលា al-Hinayah នៅជាយក្រុងភាគខាងលិចនៃទីក្រុង Taiz បានបណ្តាលឲ្យ សិស្ស ៤នាក់ រងរបួសយ៉ាងធ្ងន់ធ្ងរ»។

ទន្ទឹមនឹងនេះ ទីភ្នាក់ងារសារព័ត៌មានរដ្ឋ Saba បានរាយការណ៍ថា កងកម្លាំងរដ្ឋាភិបាល បានរារាំងដោយជោគជ័យនូវការប៉ុនប៉ងជ្រៀតចូលរបស់ក្រុមហ៊ួទីចំនួនពីរលើក ចូលទៅក្នុងតំបន់គ្រប់គ្រងដោយរដ្ឋាភិ   បាល នៅទីក្រុង Taiz ។

ក្រុមហ៊ួទី មិនបានចេញសេចក្តីថ្លែងការណ៍ណាមួយទាក់ទងនឹងឧបទ្ទវហេតុទាំងនេះទេ។

ប្រទេសយេម៉ែន បានជាប់គាំងនៅក្នុងសង្គ្រាមស៊ីវិលដ៏បំផ្លិចបំផ្លាញ ចាប់តាំងពីចុងឆ្នាំ ២០១៤ ដោយក្រុមហ៊ួទី បានប្រយុទ្ធប្រឆាំងនឹងរដ្ឋាភិបាលយេម៉ែនដែលមានការទទួលស្គាល់ជាអន្តរជាតិ។

ក្នុងឆ្នាំ ២០១៥ ក្រុមហ៊ួទី បានចូលខេត្ត Taiz ហើយបានឡោមព័ទ្ធរដ្ឋធានីរបស់ខេត្តនេះ គឺTaiz។ ទោះបីជាទីក្រុងនេះ នៅតែស្ថិតក្រោមការគ្រប់គ្រងរបស់រដ្ឋាភិបាលយេម៉ែនក៏ដោយ ក៏វានៅតែត្រូវបានឡោមព័ទ្ធដោយកងកម្លាំងហ៊ួទីដែរ។