មេដឹកនាំមកពីជុំវិញពិភពលោក បានថ្កោលទោសការវាយប្រហារភេរវករដែលសំដៅលើរោងចក្រឧស្សាហកម្មការពារជាតិ នៅក្នុងរដ្ឋធានីរបស់ប្រទេសទួរគី ជាកន្លែងដែលមនុស្ស ៥នាក់ បានបាត់បង់ជីវិត និង ២២នាក់ផ្សេងទៀត បានរងរបួស។

ជាដំបូងប្រធានាធិបតីទួរគីផ្ទាល់ លោក Recep Tayyip Erdogan បានថ្កោលទោសការវាយប្រហារលើទីស្នាក់ការកណ្តាលនៃឧស្សាហកម្មអាកាសចរណ៍ទួរគី (TAI) ក្នុងទីក្រុងអង់ការ៉ា កាលពីថ្ងៃពុធ (ទី២៣ ខែតុលា) នេះ។ លោក Erdogan បាននិយាយថា «ខ្ញុំថ្កោលទោសការវាយប្រហារដ៏សាហាវនេះ ទៅលើរោងចក្រឧស្សាហកម្មអាកាសចរណ៍ទួរគី»។

ប្រធានាធិបតីរុស្ស៊ីលោក វ្ល៉ាឌីមៀរ ពូទីន ក៏បានថ្កោលទោសការវាយប្រហារនៅខាងក្រៅកិច្ចប្រជុំកំពូលក្រុម BRICS ដែលលោក Erdogan កំពុងចូលរួមជាភ្ញៀវនោះដែរ។ លោក ពូទីន បានថ្លែងថា៖ «ខ្ញុំសូមចូលរួមរំលែកទុក្ខ ចំពោះការវាយប្រហារភេរវកម្ម។ សេចក្តីរាយការណ៍របស់ប្រព័ន្ធផ្សព្វផ្សាយ កំពុងផ្សាយពីការវាយប្រហារភេរវកម្មនៅទីក្រុងរបស់ប្រទេសទួរគី»។

អ្នកនាំពាក្យក្រុមប្រឹក្សាសន្តិសុខជាតិសេតវិមាន លោក John Kirby បានថ្កោលទោសការវាយប្រហារនេះផងដែរ។ លោកបាននិយាយថា៖ «ព្រឹកនេះ ការអធិដ្ឋានរបស់យើង បញ្ជូនទៅកាន់អ្នកដែលរងគ្រោះទាំងអស់ និងក្រុមគ្រួសាររបស់ពួកគេ ហើយជាការពិតណាស់ ប្រជាជនទួរគីផងដែរ នៅក្នុងពេលវេលាដ៏លំបាកនេះ»។

អគ្គលេខាធិការអង្គការណាតូ លោក Mark Rutte ក៏បានថ្កោលទោសការវាយប្រហារនេះផងដែរ។ លោក Rutte បាននិយាយថា៖ «យើងថ្កោលទោសយ៉ាងខ្លាំង ចំពោះអំពើភេរវកម្មក្នុងគ្រប់ទម្រង់ទាំងអស់ ហើយកំពុងតាមដានការវិវត្តន៍យ៉ាងដិតដល់។ អង្គការណាតូឈរជាមួយសម្ព័ន្ធមិត្តទួរគីជានិច្ច»។

ក្រៅពីនេះ បណ្ដាមេដឹកនាំពិភពលោកផ្សេងទៀត ក៏បានចូលរួមថ្កោលទោសអំពើភេរវកម្មនេះ និងចូលរំលែកទុក្ខជាមួយទួរគីផងដែរ ដែលមានដូចជា ប្រធានគោលនយោបាយការបរទេសរបស់សហភាពអឺរ៉ុបលោក Josep Borrell ប្រធានាធិបតីបារាំងលោក Emmanuel និងអធិការបតីអាល្លឺម៉ង់ លោក Olaf Scholz ព្រមទាំងបណ្ដាប្រទេសដទៃទៀត៕