ក្រសួងយុត្តិធម៌បានផ្ញើលិខិតមួយច្បាប់ទៅកាន់ Super PAC និង America PAC (គណៈកម្មាធិការសកម្មភាពជួយយុទ្ធនាការបោះឆ្នោត) របស់មហាសេដ្ឋីបច្ចេកវិទ្យា លោក Elon Musk ដោយព្រមានថាការផ្តល់ជូនអំណោយប្រចាំថ្ងៃចំនួន ១លានដុល្លាររបស់ខ្លួន នៅក្នុងរដ្ឋសមរភូមិ អាចជាការធ្វើឡើងផ្ទុយនឹងច្បាប់សហព័ន្ធ។ នេះបើតាមការឲ្យដឹងពីប្រភពដែលដឹងអំពីបញ្ហានេះ។

ប្រភពនោះបានប្រាប់ថា លិខិតដែលត្រូវបានរាយការណ៍នៅមុននេះដោយប្រព័ន្ធផ្សព្វផ្សាយ CNN បានមកពីផ្នែកសុចរិតភាពសាធារណៈរបស់ក្រសួង។ ផ្នែកនោះដោះស្រាយការកាត់ទោស ពាក់ព័ន្ធនឹងការបោះឆ្នោត និងករណីពាក់ព័ន្ធ។ ក្រសួងយុត្តិធម៌បានបដិសេធមិនធ្វើអត្ថាធិប្បាយទេ ហើយមន្ត្រីហិរញ្ញិករបស់ Super PAC មិនបានឆ្លើយតបភ្លាមៗនោះឡើយ ចំពោះសារជាសំឡេងដែលស្នើសុំការអត្ថាធិប្បាយ។

សម្ពាធ បាន និងកំពុងកើនឡើងលើអាជ្ញាធររដ្ឋ និងសហព័ន្ធ ដើម្បីឲ្យមានស៊ើបអង្កេតលើការផ្ដល់ប្រាក់រង្វាន់នៃឆ្នោតសំណាងរបស់លោក Musk ថា តើអាចជាការរំលោភលើច្បាប់បោះឆ្នោតដែរ ឬទេ ដែលច្បាប់នោះរួមបញ្ចូលទាំងការហាមប្រាមមិនឲ្យមានការបង់ប្រាក់ដល់អ្នកចុះឈ្មោះបោះឆ្នោត។ កាលពីថ្ងៃចន្ទ ក្រុមអតីតរដ្ឋអាជ្ញា និងអតីតមន្ត្រីរដ្ឋាភិបាលផ្សេងទៀត បានផ្ញើលិខិតមួយច្បាប់ទៅក្រសួងយុត្តិធម៌ ដើម្បីស្នើឲ្យមានការស៊ើបអង្កេត លើបញ្ហានេះ៕