ប្រធានាធិបតីរុស្ស៊ីលោក Vladimir Putin និយាយនៅថ្ងៃព្រហស្បតិ៍នេះថា តំបន់មជ្ឈិមព៌ា ស្ថិតនៅលើមាត់ជ្រោះនៃសង្រ្គាមពេញបន្ទុក ស្របពេលដែលភាពតានតឹងឡើងកម្តៅខ្លាំងយ៉ាងឆាប់រហ័សរវាងអ៊ីស្រាអែល និងអ៊ីរ៉ង់ ។

អង្គុយនៅក្បែរប្រធានាធិបតីចិនលោក Xi Jinping លោក Putin និយាយប្រាប់ជំនួបក្រុមប្រទេស BRICS+ នៅទីក្រុង Kazan ថា ការប្រយុទ្ធគ្នាដែលបានចាប់ផ្តើមកាលពីរយៈពេល ១ឆ្នាំមុន ក្នុងតំបន់ហ្កាហ្សាស្រ្ទីប ឥឡូវរីករាលដាលដល់ប្រទេសលីបង់ ។

លោកថា ប្រទេសដទៃទៀតនៅក្នុងតំបន់រងផលប៉ះពាល់ដូចគ្នា ។ កម្រិតនៃការប្រឈមដាក់គ្នារវាងអ៊ីស្រាអែល និងអ៊ីរ៉ង់ បានកើនឡើងយ៉ាងឆាប់រហ័ស រឿងទាំងអស់នេះដូចគ្នានឹងប្រតិកម្មជាខ្សែសង្វាក់ ធ្វើឲ្យតំបន់មជ្ឈិមបូព៌ាទាំងមូល ស្ថិតលើមាត់ជ្រោះនៃសង្រ្គាមពេញបន្ទុក ។

លោក Putinបន្តថា វដ្តមួយទៀត គឺការប្រឈមដាក់គ្នារវាងប៉ាឡេស្ទីន និងអ៊ីស្រាអែល បានក្លាយជាការបង្ហូរឈាមគ្នាដ៏អាក្រក់បំផុត ។ មនុស្សជាង ៤ម៉ឺននាក់ បានស្លាប់ ដោយសារសង្រ្គាមនៅហ្កាហ្សា ដែលភាគច្រើននៃពួកគេគឺជាជនស៊ីវិល ប៉ុន្តែលោកសូមធ្វើការសង្កត់ធ្ងន់ថា ពួកយើងតែងតែប្រឆាំងដាច់ខាតរាល់សកម្មភាពភេរវកម្មទាំងអស់ ។

លោកនិយាយទៀតថា ស្ថានភាពមនុស្សធម៌ កាន់តែធ្ងន់ធ្ងរផងដែរ ខណៈដែលចំនួនជនភៀសខ្លួន និងមនុស្សជម្លៀសខ្លួនបច្ចុប្បន្នកើនឡើងដល់ ១,៥លាននាក់ ៕