សម្រាប់នគរបាលប៉ាគីស្ថាន សេចក្ដីរាយការណ៍អំពីការរំលោភ នៅបរិវេណមហាវិទ្យាល័យ ដែលបានរីករាលដាលនៅក្នុងខែនេះ គឺជា «ព័ត៌មានមិនពិត» ដែលបង្កឲ្យមានភាពចលាចល។ ហើយសម្រាប់ពួកនិស្សិតដែលតវ៉ា ការបង្ហោះតាមបណ្តាញសង្គម ផ្តល់នូវការគិតដ៏កម្រជាសាធារណៈមួយ ចំពោះករណីរំលោភបំពានផ្លូវភេទ។

ប៉ុន្តែខណៈដែលការប៉ះទង្គិចគ្នាតាមគណនីបណ្ដាញសង្គម បានសាយភាយចេញពីប្រព័ន្ធអ៊ីនធឺណិត ហើយរាលដាលទៅតាមដងផ្លូវ ភាគីទាំង២ យល់ស្របដូចគ្នាថា ករណីនេះបានបង្កឲ្យកើតជាស្ថានការណ៍អាក្រក់ ដែលនាំឲ្យមានការភ័យខ្លាចពិតប្រាកដ។

នៅឯកន្លែងតវ៉ា កាលពីថ្ងៃទី២១ ខែតុលា ក្នុងទីក្រុង Lahore ភាគខាងកើត ដែលត្រូវបានអាជ្ញាធររុះរើភ្លាមៗ អ្នកតវ៉ាម្នាក់ឈ្មោះ Khadija Shabbir វ័យ ២១ឆ្នាំ បានប្រាប់សារព័ត៌មាន AFP ថា៖ «ក្មេងស្រីដែលទៅបរិវេណសាលារៀន ពិតជាណាស់ មានអារម្មណ៍ទទួលការគំរាមកំហែង»។

មន្ត្រីជាន់ខ្ពស់ លោកស្រី Syeda Shehrbano Naqvi ត្រូវបានតែងតាំងឲ្យទទួលបន្ទុកស៊ើបអង្កេតករណីដែលនគរបាលលើកឡើងដដែលៗថា ត្រូវបានបញ្ឆេះឡើងដោយពាក្យចចាមអារ៉ាម តាមប្រព័ន្ធអ៊ីនធឺណិតដែលមិនអាចផ្ទៀងផ្ទាត់បាន។

ប៉ុន្តែលោកស្រីទទួលស្គាល់ថា ករណីនេះបានប៉ះទង្គិចដល់ផ្លូវអារម្មណ៍ជាក់ស្ដែង ជុំវិញបញ្ហានៃការបៀតបៀនផ្លូវភេទ នៅប៉ាគីស្ថាន ជាប្រទេសគ្រប់គ្រងដោយបុរស ដែលការពិភាក្សាបើកចំហ អំពីការរំលោភបំពាន គឺជារឿងត្រូវបានហាមឃាត់។ លោកស្រីនិយាយថា៖ «យើងទាំងអស់គ្នានៅកន្លែងណាមួយ បានជួបប្រទះនឹងករណីនេះ។ វាជាប្រធានបទដ៏រសើបបំផុត»។

គួរបញ្ជាក់ថា ការតវ៉ានេះបានចាប់ផ្តើមកាលពីដើមខែតុលា ដោយសារការបង្ហោះតាមបណ្ដាញសង្គមជាច្រើនចោទប្រកាន់ថា បុគ្គលិកម្នាក់បានចាប់រំលោភស្ត្រីម្នាក់ នៅក្នុងបន្ទប់ក្រោមដីនៃបរិវេណមហាវិទ្យាល័យ Punjab College ក្នុងទីក្រុង Lahore៕