លោកស្រី Bushra Bibi ភរិយារបស់អតីតនាយករដ្ឋមន្ត្រីប៉ាគីស្ថាន លោក Imran Khan ត្រូវបានដោះលែងពីពន្ធនាគារ នៅថ្ងៃព្រហស្បតិ៍ (ទី២៤ ខែតុលា) នេះ ដោយមានរយៈពេលមួយថ្ងៃបន្ទាប់ពីលោកស្រីត្រូវបានអនុញ្ញាតឲ្យធានាខ្លួន នៅក្នុងសំណុំរឿង ពាក់ព័ន្ធនឹងការលក់អំណោយរបស់រដ្ឋដោយខុសច្បាប់ ដែលការនៅក្រៅឃុំនេះបានបញ្ចប់ការជាប់ពន្ធនាគារប្រមាណជា ៩ខែ។

ការដោះលែងនេះ គឺជាការសម្រាលផ្នែកផ្លូវច្បាប់ដ៏ធំបំផុត សម្រាប់លោក Khan និងគ្រួសាររបស់លោក គិតចាប់តាំងពីលោកត្រូវបាននាំខ្លួនទៅដាក់ពន្ធនាគារ កាលពីខែសីហាឆ្នាំមុន។ លោកស្រី Bibi ដែលត្រូវបានចាប់ខ្លួន កាលពីខែមករា ត្រូវបានដោះលែងពីពន្ធនាគារ Adiala ក្នុងទីក្រុងយោធភូមិ Rawalpindi ជាទីដែលលោក Khan នៅតែជាប់ឃុំដដែល។

ប៉ុស្តិ៍ទូរទស្សន៍ក្នុងស្រុក បានផ្សាយឲ្យឃើញពីអ្នកគាំទ្រមួយចំនួនតូច បានបោះផ្កាកុលាបទៅលើរថយន្ត SUV ពណ៌ស ២គ្រឿង ដែលដឹកលោកស្រីចេញពីពន្ធនាគារ។ តែយ៉ាងណាក្ដី លោកស្រី Bibi យ៉ាងហោចណាស់ ត្រូវប្រឈមនឹងបណ្ដឹងពុករលួយមួយករណីទៀត ដែលជាប់ទាក់ទងនឹងការទទួលបានដីពីក្រុមហ៊ុនរបស់អ្នកអភិវឌ្ឍន៍អចលនទ្រព្យ។

ចំណែកលោក Khan ខ្លួនឯងផ្ទាល់ ត្រូវប្រឈមជាមួយករណីជាច្រើនផ្សេងទៀត ក្នុងនោះរួមទាំងការចោទប្រកាន់ពីបទបំពានច្បាប់ប្រឆាំងភេរវកម្ម ដែលត្រូវបានបង្កើតឡើង ចាប់តាំងពីរូបលោកត្រូវបានទម្លាក់ចេញពីតំណែងជានាយករដ្ឋមន្ត្រី នៅឆ្នាំ២០២២ ហើយបានចាប់ផ្តើមចលនាតវ៉ាប្រឆាំងនឹងក្រុមរដ្ឋាភិបាលចម្រុះនៃគូប្រជែងរបស់លោកដែលដឹកនាំដោយនាយករដ្ឋមន្ត្រីបច្ចុប្បន្ន លោក Shehbaz Sharif៕