​ពិភពលោក៖ មូលនិធិ​រូបិយវត្ថុ​អន្តរជាតិ​ហៅ​កាត់​ថា IMF បាន​ព្រមាន​កាលពី​ថ្ងៃ​អង្គារ​ ទី​១២ ខែ​តុលា​ថា ​ភាព​រអាក់​រអួល​ដល់​ខ្សែ​សង្វាក់​ផ្គត់ផ្គង់​ជា​សកល​កំពុង​ជំរុញ​ឱ្យ​តម្លៃ​កើន​ឡើង​ខ្ពស់ និង​សន្ទុះ​យឺតយ៉ាវ​នៃ​ការ​ងើប​ឡើងវិញ​ពី​វិបត្តិ​សេដ្ឋកិច្ច​ដោយសារ​ជំងឺ​រាតត្បាត​សកល COVID-19។

IMF បាន​និយាយ​នៅ​ក្នុង​ទស្សនវិស័យ​សេដ្ឋកិច្ច​ពិភពលោក​ចុងក្រោយ​របស់​ខ្លួន​ថា ​ការ​រង​ផល​ប៉ះពាល់​ជា​បន្ត​បន្ទាប់ពី​ជំងឺ​រាតត្បាត​សកល​ និង​ការ​បរាជ័យ​ក្នុង​ការ​ចែកចាយ​វ៉ាក់សាំង​នៅ​ទូទាំង​ពិភពលោក​ កំពុង​ជំរុញ​ឲ្យ​ដើរ​ផ្លូវ​ផ្សេងគ្នា​កាន់តែ​ឆ្ងាយ​ទៅ​ពាក់ព័ន្ធ​នឹង​បញ្ហា​សេដ្ឋកិច្ច និង​រឹតតែ​ធ្វើ​ឲ្យ​ស្រអាប់​ដល់​ក្ដី​សង្ឃឹម​សម្រាប់​ប្រទេស​កំពុង​អភិវឌ្ឍន៍។​ ​របាយការណ៍​នេះ​បាន​និយាយ​ថា គេ​រំពឹង​ថា សេដ្ឋកិច្ច​ពិភពលោក​នឹង​កើន​ឡើង ៥,៩%​ នៅ​ឆ្នាំនេះ​ទាប​ជាង​ការ​ព្យាករណ៍​កាលពី​ខែ​កក្កដា​បន្តិច មុន​ការ​ធ្លាក់​ចុះ​មក​ត្រឹម ៤,៩%​ នៅ​ឆ្នាំ​២០២២។ ​លោកស្រី Gita Gopinath សេដ្ឋ​វិទូ​ជាន់ខ្ពស់​របស់ IMF បាន​និយាយ​ថា ​ប៉ុន្តែ​តួលេខ​ជាទូទៅ​មិនសូវ​ជា​បង្ហាញ​ពី​ការធ្លាក់ចុះ​ខ្លាំងក្លា​ទេ ហើយ​ការខិតខំ​ប្រឹងប្រែង​ដែល​ចេះតែ​បន្តសម្រាប់​ប្រទេស​មួយចំនួន ​រួមមាន​សហរដ្ឋអាមេរិក អាល្លឺម៉ង់ និង​ជប៉ុន​ដែល​កំពុងមាន​អារម្មណ៍​ថា​ មាន​ផលប៉ះពាល់​ពី​ការរាំងស្ទះ​ដល់​ការផ្គត់ផ្គង់​នេះ​។

លោកស្រី​បាន​ប្រាប់សារព័ត៌មាន AFP នៅ​ខាងក្រៅ​កិច្ចប្រជុំ​ប្រចាំឆ្នាំ​របស់ IMF និង​ធនាគារពិភពលោក​ថា​ សន្ទុះ​ងើបឡើង​វិញ​នេះ​គឺ​ពិត​ជាមាន​លក្ខណៈ​ខុសប្លែក​ពី​ទម្លាប់ ឬ​សា្ថ​ន​ភាព​ទូទៅ​។​ ​ទោះបី​មាន​តម្រូវការ​ត្រឡប់មកវិញ​ក្នុង​កម្រិត​មួយ​ខ្ពស់​ក៏ដោយ ផ្នែក​ផ្គត់ផ្គង់​មិនអាច​ត្រលប់​មកវិញ​បាន​លឿន​នោះទេ ដោយសារតែ​ត្រូវបាន​រារាំង​ដោយ​ការរីក​រាលដាល​នៃ​វីរុស COVID-19 ប​ម្លែ​ង​ខ្លួន​ថ្មី Delta ដែល​បានធ្វើឱ្យ​កម្មករ​ស្ទាក់ស្ទើរ​ក្នុងការ​វិលត្រឡប់​ទៅធ្វើ​ការងារ​វិញ​៕

អត្ថបទ៖ សុខមាន