នៅក្នុងជំរំសំពត់តង់ ស្ថិតនៅទីក្រុង Deir al Balah ក្នុងសង្រ្គាមញាំញីតំបន់ហ្កាហ្សាស្រ្ទីប ស្បៀងអាហារខ្សត់ខ្លាំងណាស់ និងតម្លៃចំណីអាហារមូលដ្ឋានស្ទើតែគ្មានលទ្ធភាពតែម្តងសម្រាប់គ្រួសារជម្លៀសខ្លួន ធ្វើឲ្យពួកគេពិបាកឈានដល់តម្រូវការទាំងនេះ ។

សម្លឡេនទីលជាមួយនំបុ័ងក្រៀម គឺជាជម្រើសតែមួយគត់ ដែលគ្រួសារអ្នកស្រី Itaf al-Omari អាចមានលទ្ធភាពទទួលទានបានសម្រាប់រយៈពេលប៉ុន្មានសប្តាហ៍កន្លងមកនេះ ។

អ្នកស្រី al-Omari ដែលរស់នៅជាមួយប្អូនស្រីរបស់គាត់ និងកូនៗរបស់ពួកគេនៅក្នុងសំពត់តង់ និយាយថា គាត់បានទៅផ្សារ ខ្ទឹមបារាំង ១មើម តម្លៃជិត ៤ដុល្លារ ខ្ទឹមបារាំង ១គ.ក តម្លៃ ១៨,៤៨ដុល្លារ គ្មានដំឡូងបារាំងលក់នោះទេ ។

ដោយមានការរឹតត្បិតផលិតផល និងស្បៀងអាហារចូលក្នុងតំបន់ហ្កាហ្សា តម្លៃចំណីអាហារមូលដ្ឋាន ឡើងថ្លៃខ្លាំងណាស់ ធ្វើឲ្យពលរដ្ឋដែលគ្មានការងារធ្វើ ពុំអាចមានលទ្ធភាពទិញបានឡើយ ។

អ្នកស្រី al-Omari និយាយថា ម៉្សៅមួយបេ.តម្លៃ ជាង ៣៩ដុល្លារ ហើយកន្លះបេតម្លៃ ១៩,៨០ដុល្លារ ប៉ុន្តែគាត់គ្មានមធ្យោបាយរកប្រាក់ ១៩,៨០ដុល្លារនោះទេ ដោយសារគ្មាននរណាម្នាក់នៅក្នុងគ្រួសាររបស់គាត់ មានប្រាក់ចំណូលនោះឡើយ ។

ចំណែកឯអ្នកស្រី Afaf ដែលបានជម្លៀសខ្លួនជាមួយប្តីរបស់គាត់ និងកូន ៦នាក់របស់ពួកគេ បានកើតជំងឺតម្រងនោម ហើយអ្នកស្រីនិយាយថា ពួកយើងគ្មានអាហារត្រឹមត្រូវទទួលទានអស់មួយរយៈពេលមកហើយ ។

ការវិភាគរបស់ទីភ្នាក់ងារព័ត៌មានរ៉យទ័រលើទិន្នន័យរបស់អ៊ីស្រាអែលបង្ហាញថា លំហូរស្បៀងអាហារមកដល់តំបន់ហ្កាហ្សា ឈានដល់កម្រិតទាបបំផុត ចាប់តាំងពីការចាប់ផ្តើមសង្រ្គាម ។

ការទទួលបានស្បៀងអាហារគ្រប់គ្រាន់សម្រាប់ពលរដ្ឋ ២,៣លាននាក់ នៅក្នុងតំបន់ហ្កាហ្សាដែលពួកគេស្ទើតែទាំងអស់ បានរត់ភៀសខ្លួន បានក្លាយជាបញ្ហាព្រួយបារម្ភបំផុតនៃសង្រ្គាម ។ ក្រុមទីភ្នាក់ងារជំនួយ បានធ្វើការព្រមានសារជាថ្មី ពីកង្វះខាតអាហារូបត្ថម្ភទ្រង់ទ្រាយធំ និងគ្រោះថ្នាក់នៃគ្រោះទុរ្ភិក្ស ៕