ដោយនៅសល់ពេលមិនដល់ជាងពីរសប្តាហ៍រហូតដល់ការបោះឆ្នោតថ្ងៃទី៥ខែវិច្ឆិកា បេក្ខជនប្រធានាធិបតីមកពីគណបក្សសាធារណរដ្ឋគឺលោក Donald Trump កំពុងបង្កើនការប្រមាថរបស់លោកលើអនុប្រធានាធិបតីលោកស្រី Kamala Harris ។

ថ្មីៗនេះ លោកTrump បានហៅលោកស្រីថាជាមនុស្សប្រមឹក និងញៀនថ្នាំ ក្នុងអំឡុងពេលព្រឹត្តិការណ៍យុទ្ធនាការមួយនៅ ទីក្រុង គ្រីន ស្បូរ៉ូ (Greensboro) រដ្ឋ North Carolina ។

អាជីវករម្នាក់មានឈ្មោះ Disha Williams មកពីរដ្ឋ South Carolina បាននិយាយថាការប្រើពាក្យសម្ដីបែបនេះមិនមែនជារឿងល្អមើលទេ។

ខ្ញុំគ្រាន់តែមានអារម្មណ៍ថាស្ដង់ដារបានធ្លាក់ចុះទាបខ្លាំងណាស់ ហើយមើលទៅអាក្រក់ណាស់ចំពោះប្រទេសផ្សេងទៀត។ យើងតែងតែគិតថាសហរដ្ឋអាមេរិកមានស្តង់ដារខ្ពស់។

ប្រជាពលរដ្ឋ ម្នាក់ទៀត ឈ្មោះ Jer-Lyn Benjamin ជាអ្នកស្រុក Atlanta បាននិយាយថា លោកTrump កំពុងវាយប្រហារលើលោកស្រី Harris ព្រោះលោកពុំមានអ្វីត្រូវបន្តទៅមុខទៀតទេ ។

រឿងតែមួយគត់ដែលលោកចេះ គឺការជេរប្រមាថ ហើយវាយប្រហារនិងលើកឈ្មោះរបស់លោកស្រី ព្រោះលោកគ្មានគោលនយោបាយ និងបន្ទោសបង្អាប់ស្ត្រីស្បែកខ្មៅ។  

ក្នុងអំឡុងយុទ្ធនាការថ្មីៗនេះ លោកស្រី Harris បានហៅលោក Trump ថាជាពួកហ្វាស៊ីសនិយម និងជាបុគ្គលគ្រោះថ្នាក់ដល់សុខុមាលភាព និងសុវត្ថិភាពរបស់អាមេរិក។

បុរសវ័យ២៧ ឆ្នាំ Bryce Bedsun មកពីរដ្ឋ Arizona គិតថាការចោទប្រកាន់ថាជាពួកហ្វាស៊ីសគឺជាកលល្បិចគួរឱ្យខ្លាច។លោកថា តាមពិតទៅ នេះជារបៀបវារៈសម្រាប់បេក្ខជនវាយប្រហារយកប្រជាប្រិយភាពរៀងៗខ្លួនប៉ុណ្ណោះ ៕