អាជ្ញាធរបាននិយាយថា ការបាញ់ប្រហាររវាងក្រុមឧក្រិដ្ឋជនពីរក្រុម ដែលកំពុងប្រយុទ្ធគ្នានៅក្នុងរដ្ឋភាគខាងត្បូងសមុទ្រប៉ាស៊ីហ្វិក ហ្គែរ៉េរ៉ូ (Guerrero) របស់ប្រទេសម៉ិកស៊ិក កាលពីថ្ងៃព្រហស្បតិ៍ (២៤ តុលា) បានបណ្តាលឱ្យមនុស្ស ១៦នាក់ស្លាប់ ខណៈប្រទេសនេះត្រូវបានវាយប្រហារដោយរលកនៃអំពើហិង្សានាពេលថ្មីៗនេះ។

នៅម៉ោងប្រហែល ៥ព្រឹកថ្ងៃព្រហស្បតិ៍ ក្រុមជួញដូរគ្រឿងញៀនទាំងនោះបានបាញ់ប្រហារដាក់គ្នានៅក្នុងតំបន់ភ្នំ និងតំបន់ជនបទរបស់រដ្ឋ ដែលបានក្លាយជាសមរភូមិកាលពីឆ្នាំមុន ខណៈក្រុមឧក្រិដ្ឋជនកំពុងចង់ពង្រីកទឹកដីរបស់ពួកគេ។

ក្រសួងការពារជាតិម៉ិកស៊ិក បាននិយាយនៅក្នុងសេចក្តីថ្លែងការណ៍មួយថា នគរបាលក្នុងតំបន់បានចូលរួមក្នុងការវាយប្រហារ ហើយមន្រ្តី ២នាក់ត្រូវបានសម្លាប់ និង ៤នាក់រងរបួស។ អ្នករបួសពេលនេះមានសុវត្ថិភាពហើយ បន្ទាប់ពីទទួលបានការព្យាបាល។

ក្រសួងបន្ថែមថា មូលដ្ឋានឆ្មាំជាតិនៅក្បែរនោះក៏បានឆ្លើយតបទៅនឹងការវាយប្រហារនេះផងដែរ ដោយមន្ត្រីយោធា ៣នាក់បានរងរបួស។ អ្នកស្លាប់ ១៤នាក់ ត្រូវបានសន្មតថាជាសមាជិកនៃក្រុមឧក្រិដ្ឋជន ហើយមនុស្ស ១១នាក់ត្រូវបានចាប់ខ្លួន៕