មន្ត្រីប្រទេសឥណ្ឌូណេស៊ី បាននិយាយកាលពីថ្ងៃព្រហស្បតិ៍ ទី២៤ ខែតុលា ថា ជនអន្តោប្រវេសន៍ ជនជាតិរ៉ូហ៊ីងយ៉ា ១៥២ នាក់ រួមមានទាំងកុមារ បានចូលចតនៅខេត្តស៊ូម៉ាត្រាខាងជើង របស់ប្រទេសឥណ្ឌូនេស៊ី ជារលកទីពីរនៃការទៅដល់ប្រទេសអាស៊ីអាគ្នេយ៍មួយនេះ ក្នុងរយៈពេលមួយសប្តាហ៍។

ទូកមួយគ្រឿង ត្រូវបានគេរាយការណ៍ថា បានដឹកបុរស ៦៤នាក់ ស្ត្រី៦២នាក់ និងកុមារ ២០នាក់ បានចូលចតកាលពីព្រឹកថ្ងៃព្រហស្បតិ៍ នៅតំបន់ Deli Serdang កោះស៊ូម៉ាត្រាខាងជើង។

ជនភៀសខ្លួន៦នាក់បន្ថែមទៀត ត្រូវបានគេរកឃើញនៅឆ្នេរសមុទ្រនៅពេលរសៀល ដែលនាំឱ្យចំនួនសរុបកើនឡើងដល់១៥២នាក់ ។

អធិការនគរបាលតំបន់ នៅតំបន់ឆ្នេរ Labu លោក Sujarwo បាននិយាយថា យើងបានជម្លៀសពួកគេទៅកាន់ការិយាល័យរង ហើយពួកគេត្រូវបានដាក់ឲ្យស្នាក់នៅបណ្តោះអាសន្ន នៅក្នុងការិយាល័យរដ្ឋបាលតំបន់។

អាជ្ញាធរ និយាយថា នឹងស្វែងរកទីជម្រកបណ្តោះអាសន្នសម្រាប់ពួកគេភ្លាមៗ បន្ទាប់ពីមានការខកចិត្តកាន់តែខ្លាំងឡើង ពីប្រជាជនក្នុងតំបន់ ចំពោះចំនួននៃជនអន្តោប្រវេសន៍ មកដល់។

ទិន្នន័យរបស់អង្គការ UNHCR បានបង្ហាញថា ជនជាតិរ៉ូហ៊ីងយ៉ា ជាង ២.៣០០នាក់ បានទៅដល់ប្រទេសឥណ្ឌូនេស៊ី កាលពីឆ្នាំមុន ច្រើនជាងចំនួនសរុបនៃការទៅដល់ក្នុងរយៈពេលបួនឆ្នាំមុន។