អាជ្ញាធរ បាននិយាយថា ការវាយប្រហារដោយគ្រាប់បែកចំនួនពីរលើក កាលពីថ្ងៃព្រហស្បតិ៍ នៅប្រទេសម៉ិកស៊ិកភាគកណ្តាល បានបណ្តាលឱ្យមន្ត្រីនគរបាល៥នាក់ រងរបួស។ ការបំផ្ទុះគ្រាប់បែកក្នុងរថយន្តមួយគ្រឿង បានកើតឡើងនៅក្នុងទីក្រុង Acambaro ទល់មុខការិយាល័យកងកម្លាំងប្រដាប់អាវុធ ដោយបានធ្វើឱ្យមន្ត្រីនគរបាល៣នាក់រងរបួស ជាការវាយប្រហារដ៏ហិង្សាបំផុតមួយនៅក្នុងប្រទេសនេះ។

អាជ្ញាធរ និយាយនៅក្នុងសារមួយនៅលើបណ្តាញសង្គមហ្វេសប៊ុក ថា ការវាយប្រហារ បានបណ្តាលឱ្យខូចខាតទ្រព្យសម្បត្តិ បំផ្លាញអគារ ធ្វើឲ្យខូចខាតលំនៅឋានដែលនៅជិតខាងចំនួនបួនខ្នង និងរថយន្តចំនួន៧គ្រឿង។

ក្នុងពេលដំណាលគ្នានោះដែរ ការវាយប្រហារបំផ្ទុះគ្រាប់បែកលើកទីពីរ ត្រូវបានគេរាយការណ៍ ថាប្រឆាំងនគរបាលល្បាតនៅទីក្រុង Jerecuaro ស្ថិតនៅចម្ងាយ៣០គីឡូម៉ែត្រ ពីទីក្រុង Acambaro ។

ប្រព័ន្ធផ្សព្វផ្សាយក្នុងស្រុក បានរាយការណ៍ថា យ៉ាងហោចណាស់មន្ត្រីពីរនាក់ បានរងរបួសធ្ងន់។ អាជ្ញាធររបស់ទីក្រុងទាំងពីរ បានអនុវត្តប្រតិបត្តិការសន្តិសុខដ៏រឹងមាំ ដោយមានការគាំទ្រពីកងកម្លាំងរដ្ឋ និងសហព័ន្ធ ដើម្បីស្វែងរកអ្នកទទួលខុសត្រូវចំពោះការវាយប្រហារទាំងនេះ។

រហូតមកដល់ពេលនេះ នៅពុំទាន់មានការចាប់ខ្លួនមនុស្សណាម្នាក់នៅឡើយ។