ក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី២៥ ខែតុលានេះ បានប្រកាស​ដាក់​ឲ្យ​ប្រើ​ប្រាស់​ជាផ្លូវការឯកសារស្តីពីតំបន់ដាំដុះដំណាំស្វាយចន្ទីរនៅកម្ពុជា ដែលគិត​មក​ដល់​បច្ចុប្បន្ន​នេះ​ផ្ទៃ​ដី​ដំណាំស្វាយចន្ទីរទូទាំងប្រទេសកម្ពុជាសរុបមានប្រមាណជាង ៥៨ម៉ឺនហិកតា។

ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ នៅក្នុងពិធី​ប្រកាស​ដាក់​ឲ្យ​ប្រើប្រាស់ឯកសារនេះ មានប្រសាសន៍ថា បច្ចុប្បន្នខេត្តដែលបាន​ដាំ​ដុះ​ដំណាំ​ស្វាយ​ចន្ទីរ​ច្រើន​ជាង​គេ គឺមានខេត្តកំពង់ធំ ក្រចេះ ស្ទឹងត្រែង សៀមរាប កំពង់ចាម ឧត្តរមានជ័យ មណ្ឌល​គិរី រតនគិរី ព្រះវិហារ ត្បូងឃ្មុំ និងខេត្តកំពង់ឆ្នាំង។ ឯកឧត្តមបានបញ្ជាក់ថា ការ​ចង​ក្រង​ឯកសារ​នេះ​ឡើង ដោយសារមើលឃើញពីសក្តានុពល និងកាលានុវត្តភាព នៃ​ការ​បង្កើន​តម្លៃ​បន្ថែម​ដំណាំ​ស្វាយ​ចន្ទី​រនេះ ខណៈលទ្ធភាពកែច្នៃក្នុងស្រុកនៅមានកម្រិត ហើយការនាំចេញ​ដោយ​មិន​មាន​ការ​កែច្នៃ បានធ្វើឲ្យបាត់បង់បន្ថែមច្រើន។ ដូច្នេះ ក្រោមការដឹកនាំរបស់សម្តេចតេជោ ហ៊ុន សែន អតីត​នាយករដ្ឋមន្រ្តី បច្ចុប្បន្នជាប្រធានព្រឹទ្ធសភាកម្ពុជា មានឆន្ទៈមុះមុត និងចក្ខុ​វិស័យ​ច្បាស់​លាស់​ក្នុង​ការប្រែក្លាយកម្ពុជា ទៅជាប្រទេសនាំ​ចេញ​គ្រាប់​ស្វាយ​ចន្ទីរ​ច្រើន​ជាង​គេ​នៅ​លើ​ពិភពលោក​។

លោក អួន ស៊ីឡុត ប្រធានសមាគមស្វាយចន្ទីកម្ពុជាបង្ហាញអារម្មណ៍សប្បាយរីករាយ និងសង្ឃឹម​ថា ការនាំចេញស្វាយចន្ទីរនឹងកាន់តែល្អប្រសើរឡើងបន្ថែមទៀត ខណៈ​ដែល​រាជរដ្ឋាភិបាល​កម្ពុជា​បាន​ដាក់​ចេញជាបន្តបន្ទាប់នូវគោលនយោបាយល្អៗ ជាពិសេសគោលនយោបាយជាតិ ស្តីពី​ស្វាយ​ចន្ទី​ឆ្នាំ​២០២២-២០២៧ ផ្តោតលើចក្ខុវិស័យការអភិវឌ្ឍន៍ផលិតកម្មស្វាយចន្ទី កែច្នៃ និង​ជំរុញ​ការ​នាំចេញស្វាយចន្ទីកែច្នៃរួច ដើម្បីបង្កើនតម្លៃបន្ថែមបង្កើតការងារ និងការលើក​កម្ពស់​ការ​ធ្វើ​ពិពិធម្ម​សេដ្ឋកិច្ចជាដើម គ្រាដែលការផលិតស្វាយចន្ទីរបស់កម្ពុជារហូតមកទល់ពេលនេះ សម្រេច​បានប្រមាណចំនួន ៨៤ម៉ឺនតោន ក្នុង១ឆ្នាំ និងឈរលើចំណាត់ថ្នាក់លេខ២ ក្នុងការ​ផលិត​គ្រាប់​ស្វាយចន្ទីរឆៅ។

សូមបញ្ជាក់បន្ថែមថា រហូតមកដល់អាណត្តិទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករេដ្ឋមន្រ្តីនៃកម្ពុជា ក៏បានបន្តជំរុញការអភិវឌ្ឍវិស័យស្វាយចន្ទី និងវិស័យ​កសិកម្ម​កម្ពុជា​ជា​រួមដើម្បីឈានទៅសម្រេចឲ្យបានចក្ខុវិស័យខាងលើទាំងអស់នេះ។ ទន្ទឹមនឹងនេះដែរ ក្រសួង​កសិកម្ម រុក្ខាប្រមាញ់ និងនេសាទ បានបង្កើនការដាក់ពង្រាយមន្រ្តីកសិកម្មឃុំ សង្កាត់ ដំណាក់​កាលទី១ និងដំណាក់កាលបន្តបន្ទាប់ទៀត ដើម្បីបំពេញ​បេសកកម្ម​ក្នុង​ការ​ជួយ​គាំទ្រ​លើ​ផ្នែក​បច្ចេកទេស ការផ្តល់ព័ត៌មាន ការប្រឹក្សាយោបល់ និងជួយដោះស្រាយ​បញ្ហា​ពាក់​ព័ន្ធ​នឹង​ការងា​រ​កសិកម្មដល់ប្រជាកសិករឲ្យកាន់តែមានប្រសិទ្ធភាព និងប្រសិទ្ធផល៕ អត្ថបទ ឈិត បូរ៉ាវី