នាយកប្រចាំតំបន់របស់អង្គការ UNICEF សម្រាប់ទ្វីបអឺរ៉ុបនិងអាស៊ីកណ្តាល លោកស្រី Regina De Dominicis បាននិយាយទៅកាន់ប្រព័ន្ធផ្សព្វផ្សាយ NHK ក្នុងទីក្រុងតូក្យូ ប្រទេសជប៉ុន កាលពីថ្ងៃព្រហស្បតិ៍ថា មន្ត្រីជាន់ខ្ពស់អង្គការសហប្រជាជាតិ និយាយថា កុមារ ១,៧ លាននាក់នៅក្នុងប្រទេសអ៊ុយក្រែន ខ្វះសុវត្ថិភាព និងការទទួលបានទឹកស្អាត ដោយសារតែការវាយលុករបស់រុស្ស៊ី លើហេដ្ឋារចនាសម្ព័ន្ធ។

លោកស្រី De Dominicis និយាយថា ការវាយប្រហារតាមអាកាសរបស់រុស្ស៊ី នៅអ៊ុយក្រែន បានបំពុលប្រភពទឹក និងបានបំផ្លាញ ឬធ្វើឲ្យខូចខាតបណ្តាញទឹកប្រវែង ១.០០០ គីឡូម៉ែត្រ។ លោកស្រី និយាយថា អង្គការយូនីសេហ្វ ព្រួយបារម្ភថា កង្វះទឹកស្អាត នឹងនាំឱ្យមានការកើនឡើងករណីជំងឺផ្សេងៗ។

លោកស្រី De Dominicis លើកឡើងថា អង្គការរបស់លោកស្រី ដោយមានជំនួយពីអន្តរជាតិ បាននឹងកំពុងធ្វើការដើម្បីដំឡើងបំពង់បង្ហូរទឹកនៅអ៊ុយក្រែន។ អង្គការយូនីសេហ្វ កំពុងជំរុញគំនិតផ្តួចផ្តើមនៅក្នុងប្រទេសអ៊ុយក្រែន ដើម្បីរៀបចំគ្រួសារប្រហែល២១.០០០គ្រួសារ ដែលមានកូនតូចៗសម្រាប់រដូវរងាខាងមុខនេះ។

កម្មវិធីនេះ បានផ្តោតសំខាន់លើគ្រួសារដែលរស់នៅក្បែរសមរភូមិជួរមុខ ដោយផ្តល់ឱ្យពួកគេនូវសាច់ប្រាក់សុទ្ធ សម្លៀកបំពាក់កក់ក្តៅ ភួយ និងស្បៀងផ្សេងៗទៀត។ លោកស្រី De Dominicis បានបញ្ជាក់ពីសារៈសំខាន់នៃកិច្ចខិតខំប្រឹងប្រែងនេះ ដោយលោកស្រី និយាយថា សីតុណ្ហភាពនៅក្នុងប្រទេស នឹងធ្លាក់ចុះក្រោមសូន្យ ដែលនឹងប៉ះពាល់យ៉ាងខ្លាំងដល់ជីវិតរស់នៅប្រចាំថ្ងៃរបស់គ្រួសារជាច្រើន ជាពិសេសកុមារ។

លោកស្រី និយាយថា បញ្ហាប្រឈមធំបំផុតសម្រាប់អង្គការយូនីសេហ្វ គឺកង្វះមូលនិធិ ហើយអង្គការយល់យ៉ាងច្បាស់ពីវិបត្តិជាច្រើនកំពុងកើតឡើងនៅជុំវិញពិភពលោក។ ប៉ុន្តែ លោកស្រី និយាយថា វាដល់ពេលហើយសម្រាប់សហគមន៍អន្តរជាតិ ក្នុងការជួយដល់អង្គការយូនីសេហ្វ ដើម្បីធ្វើការងារឱ្យបានច្រើនតាមដែលអាចធ្វើទៅបានក្នុងការធានាបាននូវជីវភាពរស់នៅសមរម្យ ជាពិសេសសម្រាប់កុមារនៅគ្រប់ទីកន្លែង។