ដោយស្លៀកសម្លៀកបំពាក់ឈុតយោធាបន្លំកាយពណ៌បៃតងនិងស្បែកជើងកវែងពណ៌ខ្មៅ គណៈរដ្ឋមន្ត្រីដែលទើបតែងតាំងថ្មីរបស់ប្រធានាធិបតីប្រទេសឥណ្ឌូនេស៊ី លោក Prabowo Subianto បានចាប់ផ្ដើមការជួបជុំនៅតំបន់ភ្នំកោះជ្វា នៅថ្ងៃសុក្រ ទី២៥ ខែតុលានេះ ដោយរំពឹងថានឹងបង្កើនទំនាក់ទំនង និងថ្លែងសង្ខេបដល់ក្រុមរដ្ឋមន្ត្រីឲ្យប្រឆាំងអំពើពុករលួយ។

អតីតមេបញ្ជាការកងកម្លាំងពិសេស លោក Prabowo ដែលបានស្បថចូលកាន់តំណែងជាប្រធានាធិបតីទីប្រាំបីរបស់ប្រទេសឥណ្ឌូនេស៊ី កាលពីថ្ងៃអាទិត្យកន្លងទៅនេះ និងបានជួបប្រជុំជាមួយគណៈរដ្ឋមន្ត្រីរបស់លោកដែលមានរដ្ឋមន្ត្រីជាង១០០នាក់ និងសមាជិកសភាកាលពីដើមសប្តាហ៍នេះបានប្រាប់ក្រុមរដ្ឋមន្ត្រីឱ្យកាត់បន្ថយការចំណាយដែលមិនចាំបាច់ និងបាននិយាយថា ការជួបជុំនេះគឺមានបំណង បង្កើនទំនាក់ទំនងគ្នា ទៅវិញទៅមក។

វីដេអូ ពីការិយាល័យប្រធានាធិបតី នៅថ្ងៃសុក្រនេះ បានបង្ហាញពីវាលស្មៅបៃតងដ៏ធំល្វឹងល្វើយនៅឯសាលាយោធាក្នុងទីក្រុង Magelang ក្នុងខេត្តជ្វាភាគកណ្តាល ដោយស្លៀកពាក់ឯកសណ្ឋានឈុតយោធាបន្លំកាយពណ៌បៃតង ដោយមានឈ្មោះរបស់ពួកគេនៅលើអាវ។

ការិយាល័យ បាននិយាយថា ប្រធានបទជាច្រើន សម្រាប់កិច្ចប្រជុំនៅថ្ងៃសុក្រនេះ រួមមានអភិបាលកិច្ច និងការទប់ស្កាត់អំពើពុករលួយ។ សកម្មភាពនានា នៅក្នុងព្រឹត្តិការណ៍ទាំងនោះក៏រួមមានការធ្វើលំហាត់សម និងការថ្លែងសង្ខេប។