អ្នកឈ្នះរង្វាន់ណូបែលជនជាតិអាមេរិក ចំនួន ៨២នាក់ ផ្នែករូបវិទ្យា គីមីវិទ្យា ឱសថ និងសេដ្ឋកិច្ច បានចុះហត្ថលេខាលើលិខិតចំហមួយ ដែលគាំទ្រអនុប្រធានាធិបតីបក្សប្រជាធិបតេយ្យ លោកស្រី Kamala Harris ឱ្យធ្វើជាប្រធានាធិបតី ខណៈរិះគន់បេក្ខភាពបក្សសាធារណរដ្ឋ លោក Donald Trump។

លិខិតនោះសរសេរថា “នេះគឺជាការបោះឆ្នោតប្រធានាធិបតីដ៏តានតឹងបំផុតសម្រាប់អនាគតនៃវិទ្យាសាស្ត្រ និងសហរដ្ឋអាមេរិក ហើយពួកយើងសូមបានចុះហត្ថលេខាគាំទ្រយ៉ាងខ្លាំងចំពោះលោកស្រី Harris”។

លិខិតនោះលើកសរសើរលោកស្រី Harris សម្រាប់ការគាំទ្រ “ភាពរីកចម្រើនផ្នែកវិទ្យាសាស្ត្រ និងបច្ចេកវិទ្យា” ខណៈបានរិះគន់លោកអតីតប្រធានាធិបតី Trump ថា “ធ្វើឱ្យប៉ះពាល់ដល់ស្តង់ដាររស់នៅរបស់ប្រជាជន ធ្វើឱ្យដំណើរការវិទ្យាសាស្ត្រ និងបច្ចេកវិទ្យាយឺតយ៉ាវ ព្រមទាំងរារាំងការឆ្លើយតបចំពោះបម្រែបម្រួលអាកាសធាតុ"។

គួររម្លឹកថា នៅក្នុងកាន់តំណែង លោក Trump ធ្លាប់បានស្នើកញ្ចប់សេដ្ឋកិច្ចដែលអាចនាំឱ្យមានការបាត់បង់ថវិកាយ៉ាងធ្ងន់ធ្ងរសម្រាប់ទីភ្នាក់ងារសុខភាព និងវិទ្យាសាស្ត្រសហព័ន្ធ រួមទាំងមជ្ឈមណ្ឌលគ្រប់គ្រង និងការពារជំងឺ, មូលនិធិវិទ្យាសាស្ត្រជាតិ, និងទីភ្នាក់ងារការពារបរិស្ថាន ហើយនៅក្នុងដំណើរយុទ្ធនាការបោះឆ្នោតឆ្នាំ២០២៤នេះ លោក Trump បានបង្កើនការគំរាមកំហែងដល់វិស័យនេះ ដោយបានបង្ហើបពីការបិទក្រសួងអប់រំផងដែរ៕