ប្រភពព័ត៌មាន បានរាយការណ៍ថា យន្តហោះចម្បាំងអ៊ីស្រាអែល បានទម្លាក់គ្រាប់បែកលើសណ្ឋាគារមួយដែលអ្នកកាសែតបានស្នាក់នៅ នៅភាគខាងត្បូងប្រទេសលីបង់។ ការវាយប្រហាររបស់អ៊ីស្រាអែលនេះបានបណ្តាលឲ្យអ្នកសារព័ត៌មានរាប់សិបនាក់ ស្លាប់និងរងរបួស។

យោងតាមទីភ្នាក់ងារការពារជនស៊ីវិលលីបង់ បានឲ្យដឹងថា អ្នកកាសែតបីនាក់ ត្រូវបានសម្លាប់ បន្ទាប់ពីយោធាអ៊ីស្រាអែល បានទម្លាក់គ្រាប់បែកលើសណ្ឋាគារមួយ នៅក្នុងទីក្រុង Hasbaya ភាគខាងត្បូងប្រទេសលីបង់។

មុននេះ មានសេចក្តីរាយការណ៍ថា របបអ៊ីស្រាអែល បានបាញ់ផ្លោងទៅលើសណ្ឋាគារ ជាទីដែលអ្នកកាសែតបានស្នាក់នៅ និងអ្នកបច្ចេកទេសដែលតាមយកព័ត៌មានអំពីជម្លោះអ៊ីស្រាអែល និងហេសបូឡា  ដោយបានបណ្តាលឲ្យមនុស្សស្លាប់ និងរបួស ជាច្រើននាក់។

ទូរទស្សន៍លីបង់ Al Jadeed News បានចេញផ្សាយរូបភាពវីដេអូ ដែលបង្ហាញពីអគារដែលត្រូវបានទម្លាក់គ្រាប់បែក ដំបូលរបស់វាត្រូវធ្លុះ និងគ្រប់ជាន់ទាំងអស់ពេញទៅដោយកម្ទេចថ្ម បន្ទាប់ពីការវាយប្រហារនោះ។

ក្រសួងសុខាភិបាលលីបង់ បានប្រកាសកាលពីថ្ងៃព្រហស្បតិ៍ថា ប្រជាជនលីបង់ចំនួន ២.៥៩៣នាក់ ត្រូវបានសម្លាប់ ចាប់តាំងពីការចាប់ផ្តើមនៃការឈ្លានពានរបស់អ៊ីស្រាអែលប្រឆាំងនឹងប្រទេសលីបង់។

យោងតាមស្ថិតិដែលប្រកាសដោយក្រសួងសុខាភិបាលលីបង់ ការវាយប្រហារដោយរបបអ៊ីស្រាអែល បានបានណ្តាលឲ្យមនុស្សចំនួន ១២.១១៩ នាក់ រងរបួស។