ក្នុងអំឡុងពេលធ្វើសន្និសីទសារព័ត៌មាន នៅទីក្រុងវ៉ាស៊ីនតោន សហរដ្ឋអាមេរិក លោក Vítor Gaspar ប្រធាននាយកដ្ឋានកិច្ចការសារពើពន្ធរបស់មូលនិធិរូបិយប័ណ្ណអន្តរជាតិ (IMF) បានលើកឡើងថា បំណុលសាធារណៈសកលនឹងមានលើសពី ១០០សែនកោដិដុល្លារ នៅឆ្នាំនេះ ដោយក្នុងល្បឿនបច្ចុប្បន្ននេះ អនុបាតបំណុលសកលធៀបទៅនឹង GDP (ផលិតផលក្នុងស្រុកសរុប) នឹងឡើងដល់ ១០០ភាគរយ នៅចុងទស្សវត្សន៍នេះ ដែលជាទំហំលើសពីកម្រិតខ្ពស់បំផុតពេលមានជំងឺរាតត្បាត។

ដោយបានបង្ហាញពីការត្រួតពិនិត្យសារពើពន្ធ លោក Gaspar បានប្រាប់ថា៖ «ឱនភាពគឺខ្ពស់ ហើយបំណុលសាធារណៈសកល គឺខ្ពស់ខ្លាំងណាស់ កើនឡើងជាលំដាប់ និងប្រកបដោយហានិភ័យ»។

លោក Gaspar បានគូសបញ្ជាក់ពីក្រុមប្រទេសចំនួន៣។ នៅក្នុងបណ្ដាប្រទេសនានា ប្រមាណជា ១ភាគ៣ បំណុលសាធារណៈ គឺខ្ពស់ជាងគេ ហើយត្រូវបានគេរំពឹងថា នឹងកើនឡើងលឿនជាងពេលមុនមានជំងឺរាតត្បាត។ ក្រុមទាំងនេះមិនត្រឹមតែរួមបញ្ចូលប្រទេសដែលមានសេដ្ឋកិច្ចធំជាងគេបំផុត ដូចជាប្រទេសចិន និងសហរដ្ឋអាមេរិកប៉ុណ្ណោះទេ ប៉ុន្តែក៏មានទាំងប្រទេសធំៗផ្សេងទៀតផងដែរ ដូចជាប្រេស៊ីល បារាំង អ៊ីតាលី អាហ្រ្វិកខាងត្បូង និងចក្រភពអង់គ្លេស ដែលប្រទេសទាំងអស់នេះតំណាងប្រមាណជា ៧០ភាគរយនៃផលិតផលក្នុងស្រុកសរុបរបស់ពិភពលោក។

បើយោងតាមការលើកឡើងរបស់លោក បានបង្ហាញថា នៅក្នុងប្រទេស ១ភាគ៣ ផ្សេងទៀត បំណុលសាធារណៈគឺខ្ពស់ជាងគេ ប៉ុន្តែត្រូវបានគេព្យាករណ៍ថា នឹងកើនឡើងយឺតៗ ឬថយចុះ បើធៀបនឹងរយៈពេលមុនមានជំងឺរាតត្បាត។ នៅប្រទេសផ្សេងទៀតរបស់ពិភពលោក បំណុលមានកម្រិតទាបជាងមុនជំងឺរាតត្បាត។ អ្នកតំណាងរបស់មូលនិធិរូបនេះបានបញ្ជាក់ថា៖ «ការត្រួតពិនិត្យសារពើពន្ធបង្ហាញថា ហានិភ័យបំណុលសាធារណៈកើនឡើងខ្ពស់ ហើយការរំពឹងទុក គឺអាក្រក់ជាងអ្វីដែលពួកគេមើលឃើញទៅទៀត»៕