ប្រដាល់សកល៖ លោក ស៊ន អេលីត អតីតកីឡាករជើងខ្លាំងប្រដាល់សកលកម្ពុជា ១រូបកាលពីជាង ១០ឆ្នាំមុន បានឧបត្ថម្ភសម្ភារៈហ្វឹកហាត់មួយចំនួនដល់ក្រុមជម្រើសជាតិប្រដាល់សកលកម្ពុជាសម្រាប់ប្រើប្រាស់ក្នុងហ្វឹកហាត់ ពិសេសអំឡុងពេលបិទខ្ទប់ប្រមូលផ្ដុំហ្វឹកហាត់នៅពហុកីឡដ្ឋានជាតិមរតកតេជោ។
អ្នកគ្រប់គ្រងក្លឹបប្រដាល់នាយកដ្ឋានអង្គរក្សរូបនេះបានប្រគល់សម្ភារៈផ្ទាល់ដោយលោកវេជ្ជបណ្ឌិត ឆឹង យ៉ៅយ៉េន ប្រធានសហព័ន្ធកីឡាប្រដាល់សកលកម្ពុជាកាលពីថ្មីៗ ហើយសហព័ន្ធបានថ្លែងអំណរគុណចំពោះការចំណាយធនធានផ្ទាល់ខ្លួន ដើម្បីរួមចំណែកអភិវឌ្ឍវិស័យកីឡាប្រដាល់កម្ពុជា។ លោក ស៊ន អេលីត បានបញ្ជាក់ថា ដោយសារខ្លួនធ្លាប់ជាកីឡាករប្រដាល់សកល និងជាអតីតជម្រើសជាតិផងដែរទើបលោកប្រឹងប្រែងជួយតាមលទ្ធភាព ដូចជាការផ្ដល់សង្វៀនរៀបចំការប្រកួត Ultimate Boxing Championship 2021 រួមជាមួយចំណាយទឹក-ភ្លើង និងសម្ភារៈមួយចំនួនដើម្បីគាំទ្រការរៀបចំកម្មវិធីនេះឡើង។
ដោយឡែកពេលនេះ ដើម្បីចូលរួមរួមចំណែកជំរុញការហ្វឹកហាត់របស់ក្រុមជម្រើសជាតិប្រដាល់សកលកម្ពុជា លោកក៏ចំណាយធនធានផ្ទាល់ឧបត្ថម្ភនូវសម្ភាសៈមួយចំនួនដូចជាស្រោមដៃប្រដាល់ ១២សម្រាប់ជូនដល់កីឡាករជម្រើសជាតិ ១២នាក់ ក្នុងម្នាក់ៗស្រោមដៃមួយ រួមជាមួយសម្ភារៈមួយចំនួនសរុបទាំងអស់ប្រមាណជាង ៤០០ដុល្លារ។ អតីតកីឡាករជម្រើសជាតិប្រដាល់សកលអំឡុងឆ្នាំ២០០៦-២០០៧ ដដែល រំពឹងថា ទឹកចិត្តបន្ដិចបន្ដួចនេះនឹងរួមចំណែកជាមួយសហព័ន្ធដើម្បីចូលរួមអភិវឌ្ឍ និងពង្រឹងការហ្វឹកហាត់របស់ក្រុមជម្រើសជាតិប្រដាល់សកលកម្ពុជាឆ្ពោះទៅរកប្រកួតប្រជែងលើឆាកអន្ដរជាតិ និងដណ្ដើមមេដាយជូនជាតិ ពិសេសត្រៀមធ្វើម្ចាស់ផ្ទះការប្រកួតកីឡាស៊ីហ្គេមឆ្នាំ២០២៣ នៅកម្ពុជា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
