រដ្ឋមន្ត្រីមកពីក្រុមប្រទេសដែលមានសេដ្ឋកិច្ចធំជាងគេទាំង២០ ឬ G20 កាលពីថ្ងៃព្រហស្បតិ៍ (ទី២៤ ខែតុលា) បានព្រមព្រៀងគ្នាថា ពាណិជ្ជកម្ម និងការវិនិយោគអន្តរជាតិ គួរតែជួយជំរុញការអភិវឌ្ឍប្រកបដោយចីរភាព និងលើកកម្ពស់ការចូលរួមរបស់ស្ត្រី ក្នុងពាណិជ្ជកម្មពិភពលោក។

អនុប្រធានាធិបតី និងជារដ្ឋមន្ត្រីពាណិជ្ជកម្មរបស់ប្រទេសប្រេស៊ីល លោក Geraldo Alckmin បានប្រាប់អ្នកសារព័ត៌មានថា រដ្ឋមន្ត្រីទាំងអស់ក៏បានយល់ព្រមលើតម្រូវការ ក្នុងការពន្លឿនដល់កំណែទម្រង់របស់អង្គការពាណិជ្ជកម្មពិភពលោក (WTO) ដើម្បីសម្រេចបាននូវប្រព័ន្ធដោះស្រាយជម្លោះដែលមានលក្ខណៈ «លឿន រហ័ស និងប្រសិទ្ធភាពជាងមុន»។

សំណើដែលទទួលបានការឯកភាពពីកិច្ចប្រជុំរដ្ឋមន្ត្រីពាណិជ្ជកម្ម G20 នៅទីក្រុង Brasilia នឹងត្រូវបានដាក់ទៅមេដឹកនាំរបស់ក្រុមនេះ នៅក្នុងកិច្ចប្រជុំកំពូលប្រចាំឆ្នាំដែលរៀបចំដោយប្រទេសប្រេស៊ីល ក្នុងខែវិច្ឆិកា ក្នុងទីក្រុង Rio de Janeiro ហើយនឹងត្រូវបញ្ចូលទៅក្នុងសេចក្តីថ្លែងការណ៍រួមរបស់ពួកគេ។

លោក Alckmin បានបញ្ជាក់ថា នេះគឺជាលើកទី១ ហើយដែលក្រុមប្រទេស G20 បានពិភាក្សាពីបញ្ហានៃការបង្កើននូវការរួមបញ្ចូលស្ត្រីទៅក្នុងពាណិជ្ជកម្មអន្តរជាតិ ដោយលោកបានបន្ថែមថា ប្រធានាធិបតីប្រេស៊ីល លោក Luiz Inacio Lula da Silva បានទទូចឲ្យការងារនេះក្លាយជាគោលការណ៍ច្បាប់របស់ G20៕