ប្រធានាធិបតីរុស្ស៊ី លោក វ្ល៉ាឌីមៀ ពូទីន បានច្រានចោលការប៉ុនប៉ងចោទប្រកាន់រុស្ស៊ីថា បង្កអស្ថិរភាពដល់ប្រទេសផ្សេងទៀតថា មិនសមហេតុផលទាំងស្រុង។

លោកបានធ្វើអត្ថាធិប្បាយនៅក្នុងកិច្ចប្រជុំជាមួយលោក Milorad Dodik ប្រធានាធិបតីនៃសាធារណរដ្ឋសាបស្កា( Republika Srpska) ដែលជាផ្នែកនៃប្រទេសបូស្នៀ និងហឺហ្សេហ្គោវីណា។

លោក Dodik បាននិយាយថា ស្ថានទូតអាមេរិក បានចោទប្រកាន់ថា៖«មានជំរុំនៅសាធារណរដ្ឋសាបស្កា ដែលនឹងរួមគ្នា [ជាមួយរុស្ស៊ី] នឹងស្វះស្វែងបង្កអស្ថិរភាពដល់សាធារណរដ្ឋម៉ូដាវី។ លោក Dodik បានពណ៌នាការចោទប្រកាន់នេះថា ជាការកុហកទាំងស្រុង និងជាមធ្យោបាយសម្រាប់លោកខាងលិច ដើម្បីព្យាយាមដាក់សម្ពាធ។

លោក ពូទីន បានឆ្លើយតបថា៖«នេះគឺជាការប៉ុនប៉ង ដើម្បីបង្រ្កាបរុស្ស៊ី។ មានសំណួរមួយនៅក្នុងសន្និសីទសារព័ត៌មានមួយនៅថ្ងៃនេះថាតើយើងនៅពីក្រោយកុបកម្ម នៅក្នុងរដ្ឋធានីលោកខាងលិចមួយចំនួនឬ? នេះ គឺជាការមិនសមហេតុសមផលទាំងស្រុង។ វាជារឿងចុងក្រោយដែលយើងត្រូវការ ហើយយើងមិនមានឧបករណ៍ ដើម្បីរៀបចំការហែក្បួន ឬកុបកម្មទេ។

យោងតាមប្រធានាធិបតីរុស្ស៊ីរូបនេះ បានឲ្យដឹងថា មូលហេតុដែលលោកខាងលិចធ្វើការចោទប្រកាន់នេះ គឺដើម្បីជំរុញរបៀបវារៈរបស់ខ្លួន និងដើម្បី «គេចចេញពីការទទួលខុសត្រូវចំពោះកំហុសជាមូលដ្ឋានដែលលោកខាងលិច បានធ្វើទាក់ទងនឹងប្រទេសផ្សេងទៀត នៅពេលដែលខ្លួនព្យាយាមការពារឥទ្ធិពល របស់ខ្លួន ទោះបីជាមានអ្វីកើតឡើងក៏ដោយ។